Në pak minuta reshje intensive, uji vërshoi rrugëve të Lezhës këtë të mërkurë, duke sjellë probleme në qarkullimin e automjeteve.
Vështirësi në lëvizje u krijua edhe në aksin Shëngjin –Kune. Të pafat ishin ata pushues që u larguan nga plazhi, për të qëndruar brenda hoteleve të prenotuara apo në banesat e tyre.
Po ashtu disa fshatra kanë mbetur pa energji elektrike për shkak të motit të keq. Reshje intensive shiu përfshinë Tiranën dhe qarqet e tjera të vendit.
Sinoptikanët parashikojnë se kthesa ekstreme e motit do të vijojë deri të premten.
“Reshjet do të zgjasin deri të premten, kryesisht në veri të vendit, ndërsa përmirësimi i motit do të nisë në fundjavë”, thotë sinoptikani Hakil Osmani.
Po ashtu temperaturat pritet të ulen me 10 gradë.
“Nga 36 do të shkojnë në 26, pra diku 3 gradë më pak sesa mesatarja e muajit Qershor”.
Në zonat bregdetare problem do të jetë edhe parametri i erës, që pritet të arrijë një shpejtësi prej 55 km/ore në det të hapur.
