Këshilli Bashkiak i Tiranës ka miratuar listën me 1,737 fitues të rinj të programit social “Për subvencionimin e interesave të kredive”, duke u krijuar mundësi individëve dhe familjeve përfituese të sigurojnë financim me kushte lehtësuese për blerjen e një banese në kryeqytet.
Lista përfundimtare e përfituesve është miratuar në mbledhjen e muajit tetor të Këshillit Bashkiak, duke i hapur rrugë vijimit të procedurave pranë bankave të nivelit të dytë për marrjen e kredive të buta, interesat e të cilave subvencionohen nga buxheti i shtetit.
Programi i subvencionimit të interesave të kredive zbatohet prej disa vitesh nga Bashkia e Tiranës dhe ka qenë një nga nismat e para të kryebashkiakut Erion Veliaj në fillim të detyrës së tij, me synimin për të lehtësuar aksesin në strehim për individët dhe familjet që e kanë të vështirë të përballojnë kostot e blerjes së një apartamenti.
Përmes këtij mekanizmi, përfituesit mbështeten financiarisht për të marrë kredi bankare për blerjen e banesës, duke përfituar subvencionimin e një pjese të interesave nga shteti.
Sipas kushteve të programit, kredia shlyhet me një normë interesi prej 3%, duke ulur barrën financiare mujore për familjet përfituese krahasuar me kushtet standarde të kreditimit në treg.
Pas miratimit të listës nga Këshilli Bashkiak, 1,737 fituesit mund të paraqiten pranë bankave të nivelit të dytë me të cilat Bashkia e Tiranës ka marrëveshje bashkëpunimi, për të vijuar procedurat e aplikimit dhe përfitimit të kredisë së butë.
Përfitimi i kredisë mbetet i kushtëzuar nga plotësimi i kritereve të vlerësimit bankar, ndërsa shuma që mund të financohet për secilin aplikues përcaktohet në bazë të numrit të anëtarëve të familjes dhe kritereve të tjera të programit.
Miratimi i listës vjen në një periudhë kur blerja e një apartamenti në Tiranë është bërë gjithnjë e më e kushtueshme, si pasojë e rritjes së çmimeve të pasurive të paluajtshme gjatë viteve të fundit.
Kjo situatë ka vështirësuar aksesin në tregun e banesave, veçanërisht për çiftet e reja dhe familjet me të ardhura të ulëta apo mesatare, të cilat shpesh nuk kanë mundësi të përballojnë këstet mujore të një kredie me normat e zakonshme të interesit.
Në këto kushte, subvencionimi i interesave të kredisë përbën një instrument mbështetës për uljen e kostos së financimit dhe krijimin e mundësive më të favorshme për blerjen e një banese.
Me miratimin e 1,737 përfituesve të rinj, programi i kredive të buta vijon të mbetet një nga instrumentet e politikave sociale të strehimit në Bashkinë e Tiranës, duke u dhënë mundësi familjeve të përzgjedhura të hedhin hapin e radhës drejt sigurimit të një banese në pronësi.
Lista e plote me poshtë
