Pas rekordit të çmimit të naftës, një tjetër tregues ka arritur një kulm të ri. Inflacioni arriti në muajin maj 6.7% nga 6.2 që ishte në prill. Inflacioni është treguesi i shtrenjtimit të çmimeve për produkte dhe shërbimet.
Ky nivel është më i larti ne 20 vitet e fundit dhe po varfëron çdo ditë e më shumë buxhetet familjare.
Referuar të dhënave nga INSTAT, të gjitha degët e ekonomisë kanë reflektuar shtrenjtim të çmimeve, krahasuar me muajin maj 2021.
Por në krye mbeten ushqimet dhe pijet me një rritje prej 4 %, e pasur nga transporti me 1.2 %, si dhe nga dega qira-lëndë djegëse.
Banka e Shqipërisë parashikon se muaji qershor-korrik pritet të arrihet niveli më i lartë i inflacionit që parashikohet në 7%, i cili më pas mund të stabilizohet për të nisur kurbën rënëse në fillim të 2023.
Por pasiguritë në tregje, ashpërsimi i sanksioneve ndaj Rusisë, ka rritur me tej çmimet këtë qershor, kryesisht të karburanteve.
