Mes 30 të nominuarve për Topin e Artë 2024 është edhe Granit Xhaka. Kjo është hera e parë që pretendent është një emër shqiptar.
Një reagim e ka bërë në rrjete sociale edhe Ragip Xhaka, babai i futbollistit, që e ka ndjekur karrierën e djemve të tij, Granit dhe Taulant Xhaka, jo vetëm si prind, por edhe si menaxher.
“Sot është një ditë e veçantë dhe e mbushur me krenari të madhe për mua dhe familjen tonë. Djali im, Graniti, është nominuar për çmimin prestigjioz Ballon d’Or. Ai është i pari shqiptar dhe në të njëjtën kohë lojtari i vetëm zviceran që ka arritur këtë nivel në botën e futbollit, dhe për këtë jemi jashtëzakonisht të lumtur dhe të emocionuar.
Puna e palodhur, përkushtimi dhe sakrificat e tij kanë bërë që ëndrrat të realizohen dhe emri i shqiptarëve të shkruhet në histori. Ju falënderoj të gjithëve për mbështetjen dhe dashurinë që i keni dhënë Granitit ndër vite.
Urime Granit, krenaria jonë!”, shkruan babai i Xhakës.
