Emocionues ishte goli i parë, i dyti, i treti në përballjen me çekinë, por kulmi i festës ishte momenti kur gjithë stadiumi këndoi “Mora fjalë”.
Të gjithë shqiptarët, të mëdhenj e të vegjël, nga Mitrovica në Konispol, që ndodheshin në stadium për ndeshjen, kënduan vargjet që i bëjnë elegji Adem Jasharit, heroit të Kosovës. Vargjet e shkruara nga Naim Gjoshi dhe kënduar nga një tjetër Adem, ku zogjtë e malit, bilbilat, lulet e trëndafilat thërrasin “Çohu Adem”. “Çohu Adem” thërriti në stadium edhe vetë djali i Adem Jasharit, Lulzimi, i cili erdhi prej Kosove me kryeministrin Albin Kurti.
Dhe jo, as gëzimi i tre golave e as emocioni i këngës patriotike nuk i bëri bashkë kryeministrat shqiptarë, të cilët qëndruan në tribuna të ndryshme. Njëri në njërin kat e tjetri në tjetrin, por që me siguri e kënduan njëzëri “Mora Fjalë”.
