Disa mjekë në vende të ndryshme po hetojnë raste misterioze të sëmundjes së rëndë të mëlçisë tek fëmijët dhe mendojnë se mund të lidhet me një lloj virusi që shkakton ftohjen.
Britania e Madhe ka identifikuar të paktën 74 raste në të cilat fëmijët u sëmurën me hepatit ose inflamacion të mëlçisë. Kështu deklaron Organizata Botërore e Shëndetësisë. Tre raste të ngjashme janë zbuluar në Spanjë dhe në Irlandë. Në SHBA janë nëntë raste të ngjashme, të gjitha në Alabama.
“Duke pasur parasysh rritjen e rasteve të raportuara gjatë muajit të fundit dhe aktivitetet e zgjeruara të kërkimit të rasteve, ka të ngjarë të raportohen më shumë raste në ditët në vijim”, thanë zyrtarët e OBSH-së në një deklaratë.
Fëmijët në SHBA varionin nga mosha 1 deri në 6 vjeç dhe dy prej tyre kishin nevojë për transplantim të mëlçisë.
OBSH-ja u ndërgjegjësua për herë të parë për sëmundjet e pazakonta në fillim të këtij muaji, kur mësoi për 10 fëmijë në Skoci me probleme të mëlçisë. Njëri u sëmur në janar dhe nëntë të tjerët në mars. Të gjithë u sëmurën rëndë dhe u diagnostikuan me hepatit pasi u dërguan në spital.
Mëlçia përpunon lëndët ushqyese, filtron gjakun dhe lufton infeksionet. Infeksionet shkaktuan simptoma si verdhëz, diarre dhe dhimbje barku. Hepatiti mund të jetë kërcënues për jetën nëse nuk trajtohet.
Që atëherë, zyrtarët britanikë të shëndetësisë kanë identifikuar të paktën 64 raste të tjera. Asnjë prej fëmijëve nuk ka humbur jetën, por gjashtë në total kishin nevojë për transplantim të mëlçisë.
Testet laboratorike kanë përjashtuar viruset e hepatitit të tipit A, B, C dhe E që zakonisht shkaktojnë sëmundje të tilla. Diçka tjetër i ka vënë këta fëmijë në rrezik.
Ata vunë në dukje se kohët e fundit ka pasur një rritje të përhapjes së adenoviruseve.
Ka dhjetëra adenovirusë, shumë prej tyre të shoqëruar me simptoma të ngjashme me të ftohtin, ethe, dhimbje të fytit dhe sy të skuqur. Por disa versione mund të shkaktojnë probleme të tjera, duke përfshirë inflamacionin në stomak dhe zorrët.
Adenoviruset më parë kanë qenë të lidhur me hepatitin tek fëmijët, por kryesisht tek fëmijët me sistem imunitar të dobësuar.
Disa nga fëmijët evropianë rezultuan pozitivë për adenovirus, dhe disa rezultuan pozitivë për COVID-19. Por nevojitet më shumë punë laboratorike për të eksploruar ndonjë lidhje të mundshme me viruse specifike, tha OBSH.
