Bëhet fjalë për një pajisje të mbërritur në Shqipëri, që njihet ndryshe si makina inteligjente. Është e lëvizshme dhe monitoron 24 orë rrugët, duke kapur edhe shkeljet që kryen. Për çdo shkelje të rregullave të qarkullimit pajisja e regjistron, pa pasur nevojë ta prekë ndonjë polic apo dikush tjetër dhe më pas gjoba për shkelësit shkon në adresën e deklaruar.
Ministri i Brendshëm Bledi Çuçi i shoqëruar nga drejtori i Përgjithshëm i Policisë, Ardi Veliu ka publikuar pamjet e pajisjes ndërsa thotë se tashmë me teknologjinë e re, shoferët të harrojnë se do të shpëtojnë nga ndëshkimi përmes favoreve mes miqsh apo telefonatash për të shpëtuar nga gjoba.
Postimi i ministrit Çuçi dhe videoja që tregon më shumë për pajisjen:
‘Harrojeni mikun dhe as mos tentoni t’i bini celularit të dikujt për të shpëtuar nga ndëshkimi në rast të shkeljes së rregullave të qarkullimit rrugor. Kjo “makinë inteligjente” dhe e lëvizshme, që monitoron rrugët e vendit ditë edhe natë, punon në mënyrë të pavarur e as nuk ka ndikim njerëzor ose subjektiv në gjykimin e shkeljes. Gjoba më pas ju vjen përmes postës në adresën tuaj të deklaruar. Apeloj drejtuesit e mjeteve të respektojnë rregullat e qarkullimit rrugor, jo thjesht për të shmangur penalizimin me gjoba prej kësaj makine, por të qenë vetë ata të sigurt nga aksidentet dhe për të mbrojtur përdoruesit e tjerë të rrugës. Shkelësit e përsëritur të rregullave të qarkullimit rrugor do të humbasin lejen e drejtimit’.
