Lugina e Shkopetit, e cila gëzon statusin e Parkut Natyror Rajonal që prej vitit 2013, është e pushtuar nga mbeturinat.
Më problematike situata paraqitet në afërsi të tunelit, ku një pirg i madh mbetjesh është krijuar prej kohësh dhe vijon të rritet.
Megjithëse, përgjatë kësaj rruge janë vendosur kontejner, qytetarët apo bizneset hedhin mbetje nga më të ndryshmet në të gjithë vijën e rrugës. Pamja është vërtetë alarmante, ndërsa institucionet mjedisore vijojnë të mos marrin masa ndaj ndotësve.
Mbetjet hidhen sërish poshtë rrugës, duke shëmtuar pamjen piktoreske të luginës, si dhe duke krijuar një ndotje të tmerrshme, pasi sa herë ka shira, ato përfundojnë në liqen.
Mbetje plastike të ndryshme kanë mbetur në sipërfaqe të ujit, duke e shëmtuar më tej pamjen e bukur të luginës, e cila ndërthuret me ujin e liqenit.
Ndonëse Shkopeti duhej të ishte një atraksion turistik, ai tashmë mund të thuhet me plot bindje se është kthyer në një vend-depozitimi mbetjesh.
