Nga Edi Oga
A e kemi kuptuar ne shqiptarët, që secili prej nesh është i vetëm në luftën kundër Covid-19?
Pandemia është një e keqe globale, por lufta me të është kthyer në një luftë individuale!
Njeriun modern e bashkon e keqja, por e ndan e mira!
Nëse njerëzimi do të mendonte për veten si një i tërë, pandemia mund të mos kishte nisur fare! Pandemia nuk është një aksident!
Dikush, për arsyet e veta, mendoi të niste këtë të keqe që do të përfshinte të gjithë globin! Disa njerëz “shpirtkazmë” u bënë bashkë dhe i bënë “dhuratë” njerëzimit hallin më të madh të këtij mijëvjeçari, të paktën deri tani!
Një e keqe globale kërkon edhe një zgjidhje globale!
A u bënë bashkë shtetet e Botës për të luftuar pandeminë?
Aspak!
Shtetet më të fuqishme përpiqen për të kufizuar dëmet vetëm për qytetarët e tyre! Ata filluan një garë të ethshme për të gjetur vaksinën para të tjerëve, mjet i cili do të sillte dy të mira njëkohësisht: do të mbronte qytetarët e vendit përkatës dhe do të krijonte mundësi biznesi për shitjen e produkteve të tyre! Ndërkohë ndërmorën masa të pakoordinuara për të kufizuar përhapjen e epidemive vetëm në vendet e tyre. Rezultati: dhjetë muaj pas shpërthimit global të epidemisë, njerëzimi nuk ka akoma një vaksinë efikase, miliona qytetarë infektohen dhe dhjetëra mijëra qytetarë humbasin jetën çdo ditë. Pa folur për ekonominë, që po rrënohet dita ditës, por me një paradoks të madh: ndërkohë që të varfrit u bënë më të varfër, të pasurit u bënë edhe më të pasur!
Po Shqipëria, ku qëndron në raport me pandeminë? “Ku thërret kjameti!”
Vaksinën e presim nga ata që nuk e kanë akoma për vete.
Spitalet kanë numër të kufizuar shtretërish për trajtim bazik dhe numër të papërfillshëm impjantesh për trajtim të specializuar!
Personeli mjeksor është i pamjaftueshëm dhe në zgrip të rraskapitjes!
Protokollet e trajtimit improvizohen dhe në rastin më të mirë kopjohen nga “më të përparuarit” të cilët nga ana e tyre improvizojnë!
Barnat dhe mjetet janë të pamjaftueshme dhe të sëmurët i blejnë me çmime të kripura me para nga xhepi i tyre!
Shteti teston pak kurse privati të rrjep lëkurën për to!
Masat parandaluese i sugjeron një komitet gjoja teknik, por i varur tërësisht nga poltikat e qeverisë! Këto masa janë në rastin më të mirë të pa vlera dhe në rastin më të keq qesharake por të imponuara me dhunë gjobash! Por nuk na e ka fajin vetëm shteti!
Fajin më të madh për përhapjen e pandemisë e kanë vetë qytetarët!
U thuhet mbani maskat, mbani distancë, lani duart – nuk i bëjnë!
U kërkohet të mos organizojnë festa dhe vakira – i bëjnë si më parë!
U kërkohet të mos dalin nëse janë të infektuar – shkojnë në punë, në festa e në vakira!
Në këto kushte, individët duket se kanë mbetur vetëm kundër Covid-19!
Secili përballet me Covidin vetëm me shpresën tek dhembshuria e Zotit për të dhe tek imuniteti i trupit të tij! Kjo nuk mjafton! Kjo nuk është luftë individuale, është luftë kolektive! Këtë luftë ose e fitojmë, ose e humbasim të tërë!
