Hashim Thaçi ka dhënë dorëheqjen si President i Republikës së Kosovës.
Thaçi ka marrë vendimin pasi është konfirmuar aktakuza nga Gjykata Speciale e Hagës për krime lufte.
Ai ka deklaruar se do të jetë i gatshëm për të gjitha hetimet e nevojshme, në një kohë që e ka përshkruar dorëheqjen e tij si një mirupafshim dhe jo lamtumirë. Thaçi ka shtuar “Ndihem krenar që kam qenë pjesë e UÇK“.
Pak më parë i është konfirmuar aktakuza edhe e kryetarit të PDK Kadri Veseli, shefit të grupit parlamentar të VV Rexhep Selimit, si dhe dje iu bastis shtëpia ish-kryetarit të kuvendit të Kosovës, Jakup Krasniqi.
Muajt e fundit Dhomat Penale të Gjykatës Speciale në Kosovë kanë iniciuar një seri procedurash hetimore ndaj ish- funksionarëve të UÇK-së duke marrë në pyetje fillimisht preidentin Hashim Thaçi.
Më 24 shtator EULEX arrestoi Salih Mustafën, ish-pjesëtar i Ushtrisë Çlirimtare të Kosovës, nën akuzat për ndalim arbitrar, trajtim mizor, torturë dhe vrasje të paligjshme.
Zoti Mustafa i mohoi këto akuza në një paraqitje para gjykatës më 28 tetor.
