“Nuk duhet të humbasim më kohë, por duhen marrë masa për të garantuar vaksinimin e popullatës nga COVID-19”, është kjo thirrja që ka bërë Presidentja e Urdhrit të Farmacistëve, Diana Toma.
Gjatë një takimi me kreun e Partisë Demokratike, Lulzim Basha, për të diskutuar mbi situatën e krijuar për shkak të pandemisë, është vënë në dukje mungesa e theksuar e medikamenteve bazë për të trajtuar koronavirusin.
Përfaqësuesi i Urdhrit të Farmacistëve, Dëfrim Goma, ka konfirmuar se Remdesiviri nuk ekziston në farmaci, por vetëm në tregun e zi, ndërkaq Toma ka ngritur shqetësimin e tregut të disbalancuar.
Presidentja e Urdhrit të Farmacistëve po ashtu është shprehur e paqartë në betejën që duhet të ndjek sistemi farmaceutik me Covid-19, pasi nuk kanë një protokoll të caktuar që duhet të ndjekin.
Më tej, kryedemokrati Basha ka kërkuar vaksinim të plotë anti-grip të popullsisë i rimbursuar nga shteti.
