Një 50-vjeçar është vrarë me armë zjarri mëngjesin e kësaj të hëne në qytetin e Fierit. Ngjarja ka ndodhur rreth orës 06:00 në lagjen “Sheq i Madh”.
Viktima është Ahmet Toska 50 vjeç. Sipas policisë, 50-vjeçari u ekzekutua nga një person i paidentifikuar. Viktima u qëllua në rrugë pasi doli nga banesa për të shoqëruar gruan në punë. Ai u vra para syve të bashkëshortes.
Sipas informacioneve policore, mësohet se Ahmet Toska punonte në një pikë karburanti, ndërsa nuk ka asnjë precedent të mëparshëm penal.
Grupi hetimor dyshon se autori ka ruajtur 50-vjeçarin, duke pritur deri sa ai të dilte nga shtëpia dhe më e qëlloi me armë. Më pas atentatori u largua me shpejtësi.
Forcat e policisë së Fierit dhe Forcat e Ndërhyrjes së Shpejtë kanë ngritur postblloqe në hyrjet dhge daljet e qytetit.
Hetuesit po bëjnë mbledhjen e provave në vendngjarje, ndërsa po punohet për të zbardhur dinamikën dhe shkaqet e kësaj vrasje.
