Italia ka aktivizuar komitetin e veprimit në luftën kundër Covid-19, pasojë kjo e shifrave në rritje të infeksioneve të reja. Të hënën u regjistruan 2 257 raste, duke e çuar numrin e përgjithshëm të të infektuarve në 327 586.
Sot në mbrëmbje pritet që qeveria në një mbledhje të këshillit të ministrave t’i japë dritën jeshile zgjatjes së gjendjes së jashtëzakonshme e cila skadon më 15 Tetor. Sipas burimeve që citojnë mediat italiane, nënshkrimi i një vendimi të tillë do të zgjaste masat e reja kufizuese me 30 ditë të tjera, përfshirë përdorimin e detyrueshëm të maskës në publik.
Parisi është vënë në alarm maksimal, duke detyruar bare, pishina dhe qendra sportive të mbyllen për dy javë, ndërsa restorantet duhet të vendosin rregulla më të ashpra sanitare për të qëndruar të hapur.
Në Paris dhe zonat përreth, kishte 260 infeksione për 100,000 banorë deri në fund të Shtatorit. Mesatarisht raportohen 3,500 infeksione të reja çdo ditë, ndërsa 36 përqind e shtretërve të njësive të kujdesit intensiv ishin të zënë nga pacientë me koronavirus.
Numri i përditshëm i te prekurve me covid në Rusi është rritur në nivelin më të lartë që nga 11 Maji. Autoritetet thanë se 188 njerëz kishin vdekur brenda natës, duke e çuar numrin zyrtar të vdekjeve në 21,663. Numri i përgjithshëm i rasteve të regjistruara që nga fillimi i pandemisë ka shkuar mbi 1.2 milionë.
Sipas të dhënave më të fundit të Organizatës Botërore të Shëndetit, aktualisht në të gjithë botën janë mbi 35.1 milionë të infektuar teksa mbi 1 milion kanë humbur jetën.
