Gazeta prestigjioze britanike “The Telegraph” ka renditur Shqipërinë si një nga destinacionet më tërheqëse për pushime verore në plazh, duke i dhënë vendin e parë Ishujve të Ksamilit në një listë prej 10 destinacionesh që rivalizojnë vendet më të njohura të Mesdheut, me një çmim shumë më të ulët.
Ishujt e Ksamilit zënë vendin e parë në këtë listë, të përshkruar si “parajsa me rërë të bardhë” që ndodhet pranë brigjeve të Sarandës dhe që ende nuk është përfshirë në itineraret masive turistike ndërkombëtare. Sipas The Telegraph, ishujt mund të arrihen vetëm me një udhëtim të shkurtër me varkë ose me not për aventurierët, ndërsa shumica e pushuesve preferojnë të akomodohen në fshatin e Ksamilit dhe të vizitojnë edhe parkun kombëtar dhe sitin UNESCO të Butrintit.
Por Shqipëria nuk përmendet vetëm për Ksamilin. Dhërmiu vlerësohet si një alternativë e mrekullueshme ndaj Rivierës Franceze, me plazhe të kristalta, male të larta që zbresin deri në det dhe ushqim deti të freskët. Po ashtu, Liqeni i Shkodrës, i ndarë me Malin e Zi, përshkruhet si një nga destinacionet më të veçanta natyrore për ata që duan pushime ndryshe, duke kombinuar relaksin me aktivitete si kajaku dhe vrojtimi i faunës.
Artikulli thekson gjithashtu përparësitë ekonomike të pushimeve në Evropën Lindore, ku një qëndrim në hotel me katër yje mund të kushtojë deri në 10 herë më pak se në Spanjë.
Sipas të dhënave të OAG, çdo javë nga aeroportet britanike nisen rreth 1,500 fluturime direkte për në Evropën Lindore, duke e bërë rajonin gjithnjë e më të aksesueshëm për turistët nga Britania dhe më gjerë.
Ja lista e plotë e “The Telegraph” me 10 destinacionet më të mira për pushime në plazh në Evropën Lindore:
Ishujt e Ksamilit, Shqipëri
Ujëvarat e Kravicës, Bosnjë-Hercegovinë
Liqeni i Ohrit, Shqipëri/Maqedonia e Veriut
Liqeni Balaton, Hungari
Dhërmi, Shqipëri
Plazhi Jaz, Mali i Zi
Jurmala, Letoni
Sozopol, Bullgari
Liqeni i Shkodrës, Shqipëri/Mali i Zi
Krynica Morska, Poloni
