Epidemiologu Ilir Alimehmeti beson se tashmë jemi në fazën e fundit të pandemisëDoktor Alimehmeti tha në Dritare TV se numri i pacientëve në spitale, tregon se situata pandemike është e qëndrueshme.
“Jemi në pjesën e fundit të pandemisë. Shifrat janë të gjitha në rënie, por nuk ka një shifër si kriter, që nëse zbresim poshtë saj të themi që tashmë kemi dalë nga pandemia. Por qartësisht ky dimër në krahasim me dimrin e shkuar, situata është më e qetë tani. Si rrjedhojë edhe dimri i ardhshëm, do të jetë akoma më i qetë. Indikatori kyç është spitali, dhe tani gjendja është e qëndrueshme me 120 të shtruar. Nuk janë pak, por nuk ka pasur rritje. Kjo është arsyeja pse nuk duhet t’i mbajmë sytë te rastet e reja, por te situate në spital”, u shpreh ai.
Alimehmeti tha se në këtë fazë të pandemisë, masat nuk kanë më kuptim, ndërsa shtoi se ato duhen lehtësuar.
“E vetmja masë që ka pasur sens është kufizimi i grumbullimeve. Por sot shkollat janë të hapura, universitetet po ashtu, ambientet e punës, pra vende me grumbullime. Por pavarësisht kësaj shohim që rastet po bien në mënyrë të pakundërshtueshme. Kjo do të thotë që përballë një situate të tillë, duhet të kuptojmë që po dalim nga pandemia, ndaj masat nuk bëjnë më sens. Shumë prej tyre duhet të hiqen, orari për shembull nuk duhet të jetë më i kufizuar”, tha Alimehmeti.
