Presidenti francez Emmanuel Macron ka refuzuar kërkesën e Kremlinit për të bërë testin rus antikovid kur takoi presidentin rus Putin, gjatë kësaj jave. Kjo sipas burimeve pranë presidencës franceze është bërë për të parandaluar Rusinë që të merrte ADN-në e Macron-it.
Si rezultat, Macron ka qëndruar në distancë nga presidenti Putin, gjatë bisedës së gjatë për tensionet mes Rusisë dhe Ukrainës.
Sipas burimeve të “Reuters”, presidentit francez i ishin dhënë dy zgjidhje, ose të pranonte testin PCR rus, ose të ruante distancën nga Putin.
“Ne e dinim shumë mirë që kjo do të thoshte se ata nuk do të kishin shtrëngim duarsh. Por nuk mund të pranonim që ata të merrnin ADN-në e presidentit,”, ka thënë një nga burimet pranë presidencës franceze, duke iu referuar shqetësimeve të sigurisë nëse lideri francez do të testohej nga mjekët rusë.
