Kur fillon të bjerë nata, tani në verë, mushkonjat shtohen. Mund të jesh ti vetë i pari që ankohesh dhe e di këtë hall, por nëse është dikush tjetër rreth teje, besoje. Ka njerëz që vertet pickohen më shumë nga mushkonjat se të tjerët. Kjo sepse mushkonjat janë insekte selektive dhe disa njerëz kanë më shumë të ngjarë të pickohen se të tjerët.
Ekzistojnë disa faktorë që mund të kontribuojnë në këtë. Në një studim të kontrolluar nga Journal of Medical Entomology, ato qëndruan më shumë tek njerëzit me tipin e gjakut 0, gati dy herë më shpesh sesa ata me Tipin A. Studiuesit mendojnë se kjo duhet të jetë të bëjë me sekrecionet që prodhojmë, gjë që i bën të mundur mushkonjave të kuptojnë llojin e gjakut të një personi.
Duhet të kryhen më shumë kërkime mbi preferencën e mundshme të mushkonjave për grupe të tjera gjaku. Por të paktën kjo vërtetoi që ato përzgjedhin.
Një tjetër aspekt është sasia e dioksidit të karbonit që çdo njeri nxjerr nga trupi. Kjo varet nga metabolizmi dhe faktorët gjenetikë, por sa më shumë dioksid karboni prodhoni, aq më shumë i tërhiqni mushkonjat pas vetes.
Duhet të dini që mushkonjat kanë sy shqiponje. Ato mund të shikojnë prej largësive të mëdha dhe i dallojnë ngjyrat.
Kështu që mënyra se si jeni veshur ka rëndësi. Nëse keni veshur rroba të errëta, do të tërhiqni më shumë, sepse ju dallojnë lehtësisht nga ambienti, ndërsa ata që veshin ngjyra të lehta nuk do të jenë aq të dukshëm dhe për pasojë, aq të kapshëm nga to.
Nxehtësia e trupit është gjithashtu e rëndësishme. Mushkonjat preferojnë gjakun që është më afër lëkurës dhe këtë e gjejnë në trupat më të ngrohtë, më të nxehtë.
Përveç faktorëve gjenetikë, temperature e trupit rritet edhe kur pini, kur bëni ushtrime fizike, kur jeni mbipeshë apo shtatzënë. Kështu që në këto raste, do ju zgjedhin sërish juve.
Tani që e di çfarë i tërheq, do e kesh më të lehtë të mbrohesh prej tyre.
