Ministria e Bujqësisë, përmes një urdhri, ka përcaktuar formën e kërkesës dhe rregulla shtesë për regjistrimin në regjistrin e vreshtave.
Akti synon të standardizojë aplikimin, të formalizojë përditësimet e të dhënave dhe të vendosë një mekanizëm verifikimi të detajuar për parcelat, duke e lidhur regjistrin me monitorimin e politikave dhe skemave që prekin sektorin.
Sipas dokumentit, vreshtarët, vjelësit, prodhuesit, përpunuesit dhe mbushësit e shisheve do të përdorin formularët përkatës sipas anekseve I, IA dhe II, të bashkëlidhura urdhrit. Me këtë hap, procesi i regjistrimit trajtohet si një procedurë e unifikuar administrative, ku i njëjti standard dokumentimi shërben si bazë si për hyrjen fillestare në regjistër, ashtu edhe për çdo korrigjim apo çregjistrim të mëvonshëm.
Për efekt të raportimit të aktivitetit, “Mbushje e shisheve” përkufizohet si vendosja e verës si produkt përfundimtar për qëllime tregtare në kontenierë me kapacitet jo më të madh se 60 litra, ndërsa “verë e fortifikuar për distilim” përcaktohet me kritere të qarta teknike: forcë aktuale alkoolike jo më pak se 18% dhe jo më shumë se 24% të vëllimit; përftim ekskluziv nga shtimi në verë pa sheqer të mbetur i një produkti të paretifikuar nga distilimi i verës me forcë maksimale reale 86% të volumit; ose aciditet i avullueshëm maksimal 1.5 gramë për litër, i shprehur si acid acetik. Këto definicione vendosin kufij të verifikueshëm për kategoritë e produktit dhe për operacionet që lidhen me tregtimin dhe distilimin.
Ndryshim i rëndësishëm është ndarja e rrugës së aplikimit sipas profilit të subjektit. Për vjelësit, prodhuesit, përpunuesit dhe mbushësit e shisheve që nuk janë vreshtarë, kërkesa bëhet sipas formularit të aneksit I. Për vreshtarët, kërkesa paraqitet sipas aneksit I, e shoqëruar me aneksin IA për secilën parcelë vreshti në përdorim me sipërfaqe 1000 m² e sipër. Ky prag prej 1000 m² e bën regjistrimin e parcelave të mëdha një proces më të detajuar, me elementë të posaçëm identifikimi dhe përshkrimi të tokës së mbjellë me hardhi.
Dorëzimi i formularëve lidhet me afate specifike dhe me autoritetin pritës në terren. Dokumentet depozitohen në Agjencitë Rajonale të Ekstensionit Bujqësor të qarkut ku zhvillohet veprimtaria. Vreshtarët dhe vjelësit duhet të dorëzojnë jo më vonë se data 31 gusht e vitit të verës në të cilin vilet rrushi për prodhimin e produkteve të verës. Prodhuesit kanë të njëjtin afat, 31 gusht, por të vitit të verës në të cilin produktet e verës përpunohen në verë ose musht. Përpunuesit dhe mbushësit e shisheve e kanë detyrimin respektivisht përpara datës së përpunimit të verës ose përpara mbushjes në shishe. Urdhri e qartëson se regjistrimi i këtyre operatorëve bëhet një herë, çka synon të shmangë aplikime të përsëritura dhe të zhvendosë fokusin tek përditësimi i të dhënave dhe kontrolli i tyre.
Vetë regjistri i vreshtave, sipas urdhrit, nuk kufizohet vetëm në informacionin bazë, por duhet të përfshijë edhe të dhëna shtesë dhe përditësime për çdo parcelë sipas elementeve të aneksit IA, të ndara veçmas në të dhënat e vreshtarëve. Kur parcelat kanë natyrë uniforme, informacioni mund të lidhet edhe me një grup parcelash të bashkëngjitura ose pjesë parcelash ngjitur, por me kusht që identifikimi i secilës parcelë të mbetet i garantuar, cilësohet në dokument.
Regjistri duhet të pasqyrojë sipërfaqen e parcelës në rastet kur hardhitë kultivohen bashkë me kultura të tjera, duke kërkuar si sipërfaqen totale të parcelës, ashtu edhe sipërfaqen e mbjellë me hardhi të shprehur si kulturë e pastër. Për më tepër, sipërfaqja e parcelës, ose sipërfaqja e kulturës së pastër hardhie, duhet të ndahet sipas destinacionit dhe vlefshmërisë për kategori prodhimi: sipërfaqe e vlefshme për prodhim vere me EOM; sipërfaqe e vlefshme për prodhim vere me TGJM; sipërfaqe e vlefshme për prodhim vere pa EOM/TGJM, por brenda zone gjeografike prodhimi verërash me EOM/TGJM; sipërfaqe e vlefshme vetëm për prodhim vere pa EOM/TGJM dhe jashtë zone gjeografike EOM/TGJM; si dhe sipërfaqe të mbjella me hardhi me destinacion tjetër.
Krahas kësaj, kërkohet të evidentohen varietetet e kultivuara të rrushit për verë dhe vlerësimi i sipërfaqeve përkatëse në përqindje, proporcionet brenda parcelës, mosha e vlerësuar kur mungon viti i mbjelljes, datat e shkuljes dhe/ose rimbjelljes kur ka të tilla, si dhe forma e përdorimit të vreshtit nga vreshtari, nëse është pronësi, bashkëpronësi, me qira apo i lënë në përdorim.
Urdhri vendos gjithashtu edhe një standard ruajtjeje për të dhënat: informacioni i regjistrit të vreshtave, i parashikuar në specifikimet e mësipërme, ruhet për aq kohë sa është e nevojshme për monitorim dhe verifikim të masave ose skemave me të cilat lidhet dhe në çdo rast për të paktën 5 vjet.
Këto rregulla kanë hyrë tashmë në fuqi me botimin në Fletoren Zyrtare.
