Sindroma e syrit të thatë paraqet shenja nga djegia apo irritimi deri te turbullimi e vështirësia për të parë qartë. Në këtë sëmundje ndikojnë shumë faktorë dhe është e përhapur pasi prek 10-30% të popullsisë në botë.
Okulistja Alda Zani shpjegon në programin “Shije Shtëpie” në Tv Klan se kjo ndodh për shkak të ekspozimit ndaj ekraneve, shtimin e sëmundjeve autoimunitare te moshat e reja, por edhe procedurat kozmetike.
Vendosja e qerpikëve falsë apo “extension” siç quhen rëndom, është një nga shkaqet pse vajzat vuajnë prej syrit të thatë. Lentet e kontaktit gjithashtu, ndaj është shumë e rëndësishme higjiena në të dyja rastet.
Alda Zani: Qerpikët falsë, ataku, ngjitësi që përdoret për qerpikët fals ngjit edhe gjëndrat e kapakut të cilat lëshojnë një pjesë yndyrore. Duke i bllokuar ato, ne prishim cilësinë e lotit sepse ataku zbukuron qerpikët tanë sepse vendos qerpikët fals, por nga ana tjetër prish cilësinë e lotit dhe ka shumë vajza dhe gra të cilat përdorin qerpikët fals, vijnë në një moment me sy të skuqur, të mbyllur, pikërisht për këtë arsye.
Katerina Trungu: Pra nuk rekomandohet të vëmë qerpikë?
Alda Zani: Mirë është nëse vendosen, të vendosen larg rrënjës së qerpikut dhe ataku ose ngjitësi të jetë profesional, të mos jetë shumë toksik.
Katerina Trungu: Ka një lloj diference, një lloj tolerance.
Alda Zani: Edhe higjiena, higjiena është shumë e rëndësishme e qerpikëve falsë, duhet të kenë një higjienë shumë të mirë, është njësoj si lentet e kontaktit sepse këto janë trupa të huaj dhe çdo trup i huaj i vendosur në trupin tonë, duhet të jetë sa më i pastër.
Katerina Trungu: Edhe lentet e kontaktit?
Alda Zani: Lentet patjetër. Lentet vendosen në sipërfaqen okulare dhe bllokojnë oksigjenimin e kornesë dhe prishin lëvizjen natyrale të lotit në sipërfaqen okulare duke e tharë syrin. Madje ka persona që duhet patjetër të përdorin lot artificial që lentja të qëndrojë e puthitur dhe pa shkaktuar skuqje apo probleme të tjera.
