Instituti i Statistikave ka publikuar të dhënat për strukturat akomoduese për muajin maj ku vihet re një rritje e ndjeshme e vizitorëve dhe netqëndrimeve, krahasuar me të njëjtin muaj të vitit të kaluar.
Turistët janë rritur me 36,6% krahasuar me të njëjtën periudhë të vitit të kaluar. Rritja u shënuar edhe sa i përket net qëndrimeve, të cilat u rritën në total me 31,5 %, por ndikimin më të madh në këtë rritje e kishin të huajt, me 35,1 %, ndërsa pushuesit vendas pësuan rritje me 20,6 %.
Ndryshe nga muajt e mëparshëm, maji ka sjellë një rritje të fortë të vizitorëve të huaj në zonat bregdetare, duke sinjalizuar nisjen e plazhit, me (+47,6 %) dhe në hotelet dhe akomodimet e ngjashme (+38,5 %).
Në Maj 2025, shumica e vizitorëve jo-rezidentë të cilët u akomoduan në strukturat pritëse në Shqipëri vijnë nga Kosova (15 %), Italia (13 %), Gjermania (9 %).
Polonia dhe Franca kontribuan përkatësisht me nga 8 % të vizitorëve, ndërsa 47 % e tyre ishin nga vende të tjera. Këto të dhëna reflektojnë prirjen e rritjes së turizmit hyrës nga tregjet kryesore të rajonit dhe Evropës. Norma e shfrytëzimit të dhomave në hotele arriti në 28,7 %, krahasuar me 25,1 % në Maj 2024.
