Pas videove të publikuara në media, ku inspektorët tatimorë kërkonin faturë nga shitësit ambulantë, Administrata Tatimore ka reaguar, duke sqaruar se kjo kategori është e përjashtuar nga ky detyrim.
Në njoftimin zyrtar, Tatimet bëjnë të ditur se sipas ligjit nr. 87/2019 dhe ligjit nr. 9920/2008, shitësit ambulantë nuk janë të detyruar të mbajnë dokumentacion tatimor apo të lëshojnë faturë për mallrat dhe shërbimet që shesin.
Kush quhet shitës ambulant?
•Mbi 16 vjeç, i vetëpunësuar, pa punonjës të tjerë;
•Shitje në hapësira publike me leje nga bashkia;
•I regjistruar në Tatime si ambulant;
• Paguan sigurimet shoqërore e shëndetësore, tarifën e hapësirës publike dhe taksat bashkiake.
Administrata Tatimore thekson se mbetet e angazhuar për të ndërtuar një klimë besimi me qytetarët, duke siguruar që politikat tatimore të zbatohen në mënyrë të drejtë, transparente dhe të kuptueshme për të gjithë.
