Versioni beta i iOS 26 qarkullon prej disa javësh dhe të apasionuarit pas teknologjisë po zbulojnë risi që nuk u bënë të ditura gjatë WWDC (Worldwide Developers Conference).
Një nga opsionet më të fundit është turbullimi i pamjes nga FaceTime kur dallon nuditet. Nëse FaceTime e bën këtë, shfaqet mesazhi: “Audio dhe video janë ndaluar sepse mund të jesh duke shfaqur diçka të ndjeshme. Nëse nuk je rehat, mund ta mbyllësh telefonatën.”
Sipas Engadget, opsioni mund të aktivizohet te Settings nën kategorinë Sensitive Content Warning. “Dallo fotot dhe videot nudo para se të shfaqen në pajisjen tuaj dhe merr ndihmë për të bërë një zgjedhje të sigurt. Apple nuk mund të hyjë te fotot dhe videot”, shkruhet krah opsionit.
Duket se ky i fundit është vendosur për llogaritë e të miturve, por munnd të aktivizohet edhe për të rriturit.
Në faqen e ndihmës ndaj përdoruesit të Apple, thuhet: “Communication Safety përdor mësimin makinerik për të analizuar bashkëngjitjet foto dhe video dhe për të përcaktuar nëse përmbajnë nuditet. Për arsyen se fotot dhe videot analizohen në pajisjen e fëmijës, Apple nuk merr një udhëzim se është dalluar nuditet dhe si rezultat, s’mund të hyjë te fotot ose videot.”
Megjithatë, duhet theksuar se opsionet në versionin beta ndryshojnë vazhdimisht dhe nuk dihet nëse ia dalin që të prezantohen në përditësimin final të programit.
