Çipet neurale kanë nisur të prodhohen edhe nga Kina. Pas Neuralink të Elon Musk, ku pajisja e parë u implantua në një pacient në shkurtin 2024, sipas revistës Nature janë dy kompani, StariMede dhe NeuroXess, me mbështetjen e Qeverisë Kineze, që janë në fazë eksperimentimi të teknologjisë.
Një ndër pajisjet që po prodhojnë përbëhet nga 8 sonda, në gjendje të rikthejnë lëvizjet e dorës te një pacient i paralizuar, duke përdorur një dorezë pneumatike.
Pacienti i parë i është nënshtruar një ndërhyrjeje në 2023 dhe tashmë arrin të ushqehet dhe të pijë në mënyrë autonome. Ndërkohë që në listë pritjeje janë edhe 20 të tjerë.
Ndërkohë që kompania tjetër po specializohet dhe vëzhgon progreset në një çip që implantohet në tru. Rastet e suksesshme deri tani i referohen një gruaje që vuante nga epilepsia, e cila dy javë pas ndërhyrjes arriti të kontrollojë karrocën e saj dhe mediat sociale.
Ndërsa një tjetër grua me tumor cerebral arriti të komunikojë edhe 50 fjalë në minutë, rezultat mjaft premtues.
Pra, e ardhmja që po projektohet me zhvillimet teknologjike po bën përparime, dhe rezultatet në 2 vitet e fundit flasin për suksese të shkencës, me pacientë të paralizuar që arrijnë të lëvizin gjymtyrët, apo kontrollojnë me mendim të folurin dhe veprime nëpërmjet çipit të implantuar në tru dhe ndërveprimit njeri-makinë.
