Shqipëria është përfshirë nga një valë të nxehti që ka sjellë temperatura të larta në të gjithë territorin. Sipas meteorologut Hakil Osmani nga MeteoAlb, kjo situatë pritet të zgjasë deri në mesjavë, ndërsa në fundjavë pritet një rënie e lehtë e temperaturave dhe mundësi për reshje të izoluara.
“Dita e sotme (e hëna) ka shënuar temperatura të larta, sidomos në qytetet e mëdha dhe në zonat bregdetare. Në Tiranë dhe përgjatë bregdetit, temperaturat kanë arritur deri në 39°C,” – u shpreh Osmani.
Ndërkohë, edhe zonat malore nuk kanë mbetur pas, me temperatura maksimale që shkojnë deri në 32–33°C. Kjo rritje e temperaturave është rezultat i masave ajrore të thata dhe të nxehta që kanë përfshirë rajonin.
Sipas parashikimeve, vala e të nxehtit do të vijojë deri të mërkurën dhe të enjten, me temperatura që do të mbeten të larta në të gjithë vendin. Në pjesën më të madhe të territorit do të mbizotërojë moti i kthjellët, me pak re të përkohshme gjatë pasditeve.
Ndryshimi i parë i ndjeshëm pritet të vijë gjatë fundjavës. Meteorologu Osmani shpjegon se nga e premtja do të ketë një rënie të lehtë të temperaturave me 1–2 gradë Celsius, duke sjellë një lehtësim të valës së të nxehtit.
Gjithashtu, mund të ketë rrebeshe të shkurtra shiu në zona të izoluara, kryesisht në relievet kodrinore-malore gjatë orëve të pasdites.
Meteorologët këshillojnë qytetarët që gjatë ditëve me temperatura ekstreme:
Të shmangin ekspozimin e drejtpërdrejtë në diell gjatë orëve të pikut (11:00–17:00).
Të konsumojnë sa më shumë lëngje dhe ujë.
Të mbajnë veshje të lehta dhe ngjyra të hapura.
