Nga Belina Pupa
Ka një shprehje që na është ngulitur në mendje që në fëmijëri:
“Mendje e shëndoshë, në trup të shëndoshë.”
Sot, kjo shprehje tingëllon më aktuale se kurrë. Sepse mirëqenia nuk është vetëm çështje fizike – ajo përfshin gjendjen tonë emocionale, qasjen ndaj jetës, marrëdhëniet që ndërtojmë dhe mënyrën si kujdesemi për veten.
E vërteta është se jeta shpesh na zë në befasi. Ngarkesat, ritmi i shpejtë, presioni për të qenë gjithmonë “në lartësinë e duhur” – të gjitha këto na bëjnë të harrojmë një gjë të rëndësishme: veten tonë. Por kujdesi për veten nuk është egoizëm. Është përgjegjësi. Sepse gjithçka nis nga ne.
Trupi dëgjon gjithçka që i themi
Ushqimi, lëvizja, ritmet e gjumit – janë më shumë se rutina. Janë mënyra për t’i dhënë trupit mesazhin: “Të vlerësoj. Të dua.”
Një regjim i balancuar nuk do të thotë kufizim, por zgjedhje të vetëdijshme. Po, edhe një picë ose një gotë verë e shijuar me kënaqësi është pjesë e kësaj dashurie ndaj vetes.
Të flasim. Të ndajmë. Të jemi bashkë.
Si psikoterapiste, e shoh çdo ditë sesa shumë rëndojnë emocionet e pathëna. Heshtja na bën të ndihemi vetëm, por fjala – edhe kur është e vështirë – është shërim.
Mos e mbaj brenda. Fillo nga një bisedë me një mik. Një mesazh. Një telefonatë. Nëse ndihesh i/e mbingarkuar, kërko ndihmë profesionale. Nuk je vetëm.
Mos e shty për të hënën tjetër
Ndryshimi nuk ka nevojë për data të mëdha. Ka nevojë për një hap të vogël, por të qëndrueshëm.
Lëvize pak trupin. Dil për ajër të pastër. Largo telefonin për disa minuta dhe dëgjo veten. Shiko çfarë po ndien.
Mjafton një moment për ndryshim.
Dashuria për veten është një praktikë e përditshme
Çdo herë që zgjedhim të ushqehemi mirë, të pushojmë, të vendosim kufij, të themi “jo” kur na rëndon – po i japim vetes dashuri.
Kur jemi të mirë me veten, bëhemi më të mirë edhe me të tjerët. Më të pranishëm. Më të plotë.
Mbaje mend:
Të kujdesesh për veten nuk është luks. Është domosdoshmëri.
Dhe ti e meriton këtë kujdes. Çdo ditë.
Ky artikull është frymëzuar nga Love Yourself Albania – një dritare në rrjetet sociale që promovon zakonet e shëndetshme dhe dashurinë për veten.
