Pas shtatë vitesh diskutime, Bashkimi Evropian ka vendosur të mos e heqë orën verore. Kjo do të thotë se më 30 mars, akrepat e orës do të spostohen një orë përpara, duke na marrë 60 minuta gjumë.
Italia dhe disa vende të tjera kanë mbështetur mbajtjen e këtij ndryshimi, kryesisht për shkak të kursimeve në faturat e energjisë. Llogaritet që me orën verore, çdo vit kursehen rreth 100 milionë euro, pasi njerëzit përdorin më pak drita në mbrëmje.
Për shumicën e njerëzve, ky ndryshim është thjesht një bezdi e vogël, por për disa, mund të ndikojë në ritmin e gjumit dhe të lodhjes. Megjithatë, edhe pse debati përsëritet çdo vit, qeveritë evropiane ende nuk kanë marrë një vendim përfundimtar për ta hequr këtë praktikë. Për momentin, ora verore mbetet pjesë e jetës sonë.
