Kryeministri Edi Rama ndau sot pamje nga tuneli i Murrizit, pjesë e rrugës së Arbrit që lidh Tiranën me Dibrën, i cili parashikohet të hapet ditën e nesërme. Nga video e publikuar nga kryeministri Rama, vihet re se tuneli është gati për qarkullimin e automjeteve.
Hapja e tunelit të Murrizit e bën të aksesueshme edhe të gjithë rrugën e Arbrit, pas vite të tëra punimesh dhe rritje të kostove, kjo edhe për shkak të gjeologjisë së tokës dhe vështirësive që kanë dalë gjatë punimeve, sidomos në segmente të caktuara të rrugës.
Tuneli i Murrizit ka një gjatësi prej 3,78 kilometrash dhe përbëhet nga dy tuba, ai i trafikut dhe ai i emergjencës. Ai ka 11 dalje. Në total Rruga e Arbrit ka 7 tunele, me gjatësi totale 8,5 km.
Kryeministri Edi Rama gjithashtu se rruga e Arbrit dhe tuneli i Murrizit sa të jetë ai kryeministër nuk do të jenë me pagesë.
Në bashkëbisedimin live me qytetarët në platformat sociale, Rama u shpreh se, “tuneli i Murrizit është i ndërtuar me PPP (partneritet publik-privat), e gjithë rruga e Arbrit, që do të thotë i ka dalë shtetit shqiptar dhe iu ka dalë taksapaguesve shumë më lirë sesa rrugët që bëheshin sidomos dikur me tenderë që pastaj ktheheshin në histori abuzimi duke shtuar e shtuar fonde për punime të paparashikuara”.
“Këtu kontrata qysh në krye të herës u bë që për çdo gjë të paparashikuar e mbulon sipërmarrësi privat dhe imagjinoni nëse tani tuneli të ishte në mëshirën e fondeve publike sa do na kishte kushtuar rruga e Arbrit”, u shpreh Rama.
Ndërkohë që, shtoi kreu i qeverisë, “kostot shtesë, në bazë të kontratës i mori përsipër sipërmarrësi”.
Kryeministri siguroi se rruga e Arbrit dhe tuneli i Murrizit sa të jetë ai kryeministër nuk do të jenë me pagesë.
