Kryeministri i Kosovës, Albin Kurti deklaroi se nga ky muaj do të hyjë në fuqi rritja e pensioneve për të moshuarit në 20%. Ndërkohë nga janari i vitit që vjen pensionet do të rriten në të njëjtën masë dhe për veteranët e luftës.
“Nga ky muaj, pra nga muaji tetor do të rriten për 20 për qind pension bazik i moshës, pensioni kontribut pagues i plotë dhe parcial, pensioni i aftësisë së kufizuar për fëmijë dhe të rritur, pensioni për personat e verbër, pensioni për personat paraplegjik e tetraplegjik, pensioni familjar, pensioni invalidor i punës dhe pensioni i parakohshëm për punëtorët e Trepçës”, u shpreh Kurti.
Kryeministri ka shpjeguar se për familjet e dëshmorëve të UÇK-së dhe të të zhdukurve që kanë më shumë se një dëshmor ose të zhdukur do të ndryshohet edhe formula e pensionit, duke e rritur atë për 50 për qind të pensionit bazë për çdo dëshmorë apo të zhdukur tjetër që ka familja.
“E njëjta formulë do të përdoret edhe për familjet e viktimave dhe të zhdukurve civil ku për çdo viktimë apo të zhdukur tjetër që ka familja, pensioni do të rritet për 50 për qind të pensionit bazë”, bëri të ditur në konferencë kryeministri Kurti.
