Kush punon në bashki do të marrë nga 20-40% më tepër në pagën e tij. Nga 930 mijë lekë të vjetra aktualisht, punonjësi i bashkisë në rastin me te keq do të marrë mesatarisht 1 milion e 110 mijë lekë të vjetra ose 1 milion e 300 mijë lekë të vjetra në rastin më të mirë.
Veç rritjes së pagave me qëllim sheshimin e hendeqeve, punonjësit e bashkive në vijim do të trajtohen njësoj si kolegët e tyre që punojnë në ministri edhe në drejtime të tjera.
“Është një kërkesë e vazhdueshme e qeverisjes lokale për të bërë një balancim dhe pse jo një barazim të nivelit të pagave të specialistit në nivel vendor me specialistin në nivel qendror. Kjo për arsyen se shumë bashki vuajnë nga mungesa e burimeve njerëzore. Përllogaritje e vjetërsisë në punë do të bëhet si në nivel qendror pasi deri më tani ka qenë diskriminuese. Gjithashtu do të bëhet barazimi i specialistëve, pavarësisht numrit të popullsisë në bashkinë ku ata punojnë”, tha Adelina Farrici, Drejtoreshë Ekzekutive e Shoqatës për Autonomi Vendore.
