Më 1 korrik do të ketë një rritje të madhe të pagave të punonjësve të policisë. Lajmi u konfirmua nga ministri i Brendshëm, Taulant Balla i cili tha se rritja e pagës do të jetë e fortë.
“Sa i përket pagave me kryeministrin dhe ministrin e finanacave po vazhdojmë të kemi një diskutim intensiv që në 1 korrik të realizojmë një pritshmëri shumëvjecare të punonjësve të policisë të kemi një rritje të fortë të pagave e cila vjen për shkak të mirëmenaxhimit financiar“, tha Balla.
Po ashtu, rritje pagash do të ketë edhe në sektorin e arsimit, ku do të përfitojnë kryesisht mësuesit në arsimin parauniversitar. Shtesë në pagë parashikohet edhe për mjekët, infermierët, forcat e rendit, të mbrojtjes, si edhe punonjësit e niveleve zbatuese në administratën qendrore.
Synimi i Qeverisë Rama është që me këtë rritje, paga mesatare në shtet të arrijë në 900 euro në muaj.
