Nëndrejtoresha e Departamentit të Sistemeve të Pagesave, Valentina Semi ka bërë një analizë të hollësishme sigurisë që garantojnë kartat bankare, bankomatët, dhe POS-et që përdoren aktualisht në vend.
Ajo së pari thotë se qytetarët janë të siguruar nga çdo keqpërdorje e mundshme e kartave të tyre, pasi çdo dëm që mund t’u vijë e mbulon banka përkatëse.
Nga ana tjetër, nivelet e sigurisë që ka adoptuar sistemi bankar shqiptar janë ndër më të lartat në botë, gjë që e provon fakti se incidentet me automatët apo POS-et në vend janë shumë të pakta, madje edhe në raport edhe me vende mjaft të zhvilluara.
Reglend Xhango, kryetar i Komitetit për Sigurinë Kibernetike ne Shoqatën Shqiptare të Bankave thotë se bankat në vend investojnë shumë në sisteme sigurie, si për të mbrojtur klientët e tyre, ashtu edhe pajisjet fundore, si automatët apo POS-et.
Ndërkaq, sipas tij, qytetarët janë më pak të ekspozuar ndaj vjedhjeve, pasi kryesisht keqbërësit synojnë bankomatët.
