Mikroalga Schizochytrium, një burim i shkëlqyer i acidit yndyror DHA ose acidit docosahexaenoic, mund të bëhet aleati i ri për zemrën, sipas një studimi nga studiuesit nga Universiteti Nord i Norvegjisë.
DHA-ja është një nga grupet më të rëndësishme të acideve yndyrore omega-3 për shëndetin kardiovaskular falë aftësisë që ka për të reduktuar kolesterolin e keq LDL dhe trigliceridet. Marrja e këtyre lëndëve ushqyese nga burimi i tyre kryesor, vaji i peshkut, në mënyrë të arsyeshme mund të shërbejë për të minimizuar rrezikun e sëmundjeve kardiovaskulare, shkaku numër një i vdekjeve në mbarë botën. Megjithatë, siç vëren studiuesi Adnan Gora, “nëse e gjithë bota do të plotësojë nevojat e saj për vaj omega-3 nga vaji i peshkut, së shpejti do të ketë një mungesë të konsiderueshme.”
“Në Universitetin Nord po punojmë me përbërës bioaktivë nga mikroorganizmat, ku po kërkojmë edhe alternativa për vajrat e peshkut. Qëllimi ynë është të studiojmë se si produkte të tilla mund të përdoren për të përmirësuar shëndetin e njeriut.”-tha studiuesi mbi gjetjet e fundit që konfirmuan se vajrat e bëra nga mikroorganizmi detar përmirësonin shënuesit e shëndetit kardiovaskular.
Siç shpjegon Gora, ata testuan qindra lipide të ndryshme në gjakun e peshkut zebra pasi ato janë ideale për simulimin e simptomave të hershme kardiovaskulare të njeriut, si dhe për hetimin e efektivitetit të barnave të ndryshme për të parandaluar sëmundjet te njerëzit.
Studiuesit formuan tre grupe peshqish: një grup ushqehej me një dietë të lartë me kolesterol dietik, grupi i dytë ushqehej me të njëjtën dietë dhe shtesë me vaj Schizochytrium dhe një grup kontrolli (dietë e zakonshme pa suplemente).
Rezultatet treguan se suplementi:
Moderoi efektet e një diete me kolesterol të lartë.
Uli nivelet e kolesterolit dhe triglicerideve në gjak. “Skenari ideal” siç komentoi Gora pasi studimet njerëzore tregojnë se rritja e kolesterolit të mirë HDL pa ulur njëkohësisht trigliceridet nuk është e mjaftueshme, përcjell dritare.net
Për të fituar më shumë njohuri mbi mekanizmat pas efektit të vajit në kolesterolin total, studiuesit vëzhguan se si gjenet e peshkut reaguan ndaj dietave të ndryshme. Sipas Gora, ata zbuluan se ushqyerja me një dietë të lartë me kolesterol dietik bëri që peshku të fikte gjenet që normalisht ndihmojnë trupin të prodhojë kolesterol (endogjen).
“Sinteza e kolesterolit ndodh vetëm kur ka mungesë të kolesterolit. Pra, kur trupi zbulon një tepricë, ai ndalon së e prodhuari. Kur shtuam vajin në dietë, këto gjene u aktivizuan sërish. Kjo tregon se efekti i kolesterolit të lartë nuk ishte më i pranishëm.”, shpjegoi Gora. Përveç kësaj, të dhënat treguan se gjenet që kontribuojnë në prodhimin e kolesterolit të mirë u aktivizuan duke marrë suplementin.
Studiuesit panë reagimin e mëlçisë ndaj çdo situate të ushqyerjes dhe vunë re se dieta me kolesterol të lartë shoqërohej me më shumë vakuola yndyrore në hepatocite, vezikula që përmbajnë një lëng të holluar me ujë, në kontrast me peshkun e plotësuar. Prania e vakuolave të tilla në hepatocite shoqërohet me steatozë, pra me akumulim yndyre.
