Duke filluar nga 1 Tetori çmimi i energjisë elektrike do të rritet për abonentët familjarë që shpenzojnë mbi 800 kWh. Ndryshe nga tarifa prej 9.5 lekë që paguanin deri tani, me vendosjen e fashës së energjisë do të paguajnë 42 lekë.
Konfindustria ka kërkuar nga qeveria rishikimin e vendimit për vendosjen e fashës orare, pasi sipas saj gjatë muajve të dimrit ky kufi kalohet nga thuajse 13-20% e familjeve.
“Konfindustria i kërkon ekzekutivit të rishikojë vendimin për kufirin e konsumit të energjisë elektrike mbi të cilën do të zbatohet pagesa me çmimet e tregut ndërkombëtar për familjarët. Në këtë kuptim kërkohet, që kufiri të jetë jo më pak se 1200 kË/muaj nga 800 kË/muaj të paralajmëruar.
Konfindustria vlerëson, se kufiri prej 800kË/muaj konsum i energjisë elektrike në muajt e ftohtë tejkalohet nga jo më pak se 13-20% e familjeve, varësisht ashpërsisë së kushteve të motit. Sa më sipër do të thotë, që në mënyrë të drejtëpërdrejtë do të preken të ardhurat e 90-130 mijë familjeve. Pjesa dërrmuese e familjeve shqiptare sidomos në zonat urbane ngrohjen gjatë muajve të dimrit e kanë mbështetur kryesisht te energjia elektrike. Goditje më të fortë do të marrin buxhetet e familjeve me të ardhura të mesme. Njëkohësisht do të preken edhe më tej familjeve me të ardhura të ulta dhe shtresat në nevojë. Ndikimi i buxheteve familjare do të përcillet me pasoja të rënda shtesë te konsumi, bizneset dhe ekonomia kombëtare”, shkruan Konfidustria.
Ndërkaq shton se Shqipëria ka pavarësi energjetike për afro 75% krahasuar me vendet e tjera, por problem mbeten HEC-et.
“Shqipëria ka pavarësi të fortë, në jo më pak se 75%, krahasuese me shtetet e tjera të Europës nga ndikimi i çmimeve të energjisë elektrike në bursat ndërkombëtare, përfshi edhe krizën e fundit të gazit rus. Sistemi energjetik shqiptar ka kapacitete të instaluara të prodhimit të energjisë elektrike më të mëdha sesa konsumi. Në vitin 2021 Shqipëria prodhoi 6.5% më shumë energji elektrike sesa nevojat e saj.
Problematikat kryesore qëndrojnë te:- varësia ndaj kushteve të motit, meqenëse ende prodhimi mbështetet te HEC- et si edhe – keqmenaxhimi i sistemit. Niveli i humbjeve teknike dhe jo teknike prej vitesh është mbi 21% të totalit me vlerë mbi 120 milion euro vit. Shumë pak është bërë në shtimin e shfrytëzimit të prodhimit të energjisë nga burimet diellore, të erës, etj. Gjithashtu, në mënyrë të pashpjegueshme TEC- i Vlorës me fuqi afër 100 MGw edhe pas 11 vitesh nuk është në gjendje pune”, përfundon Konfidustria.
