“Festa e Birrës”/ Nata e pestë, uragani i muzikës shqiptare do të jetë në Korçë

Pas një nate tejet të zjarrtë dhe festive, me yllin e muzikës greke Konstaninos Argiros dhe këngëtaren Anxhela Peristeri, sonte në “Festën e Birrës” në Korçë, do të performojë uragani i muzikës shqiptare, Aurela Gaçe.

Sonte në natën e fundit të festës më popullore në Shqipëri, e cila promovon traditën dhe qytetin e bukur të Korçës, këngëtarja Aurela Gaçe do të elektrizojë skenën me zërin dhe performancën e saj.

Edhe këtë edicion, “Festa e Birrës” në Korçë mblodhi mijëra turistë, të cilët zgjodhën këtë qytet për të shijuar netët e gjata dhe të nxehta të verës, nën shoqërinë e muzikës së mirë dhe ushqimeve tradicionale dhe markave më të njohura të pijeve.

Hapja e festës sonte bëhet në orën 20:00, te terminali i autobusëve.

Një natë për të mos u humbur, pasi ashtu si gjithnjë Aurela Gaçe me këngët dhe performancën e jashtëzakonshme do të kujdeset që nata e fundit e “Festës së Birrës” në Korçë të jetë e paharrueshme.