Për herë të tretë këtë vit, Sydney është goditur nga përmbytjet masive. Për reshjet e dendura shkencëtarët fajësojnë kombinim e disa faktorëve. Por në rrjetet sociale janë përhapur gjerësisht teori për manipulim të motit, pretendime në fakt të pabaza.
Në vetëm 4 ditë, në qytetin më të madh të Australisë ra shi sa për 8 muaj… Ekspertët thonë se ky mot ekstrem nuk mund të shpjegohet me një faktor të vetëm dhe gishtin e drejtojnë nga ngrohja e oqeaneve dhe toka e lagësht, si faktorë kontribuues.
Por konspiracionistët nuk e besojnë këtë. Në mediat sociale, për motin ekstrem ata ia venë fajin “mbjelljes së reve” dhe “manipulimit të motit”.
Siç shkruan edhe BBC, nuk ekzistojnë të dhëna që mund të mbështesin teori të tilla, megjithatë kjo nuk i ka penguar pretendimet e rreme që të përhapen në mijëra persona online.
Çfarë është mbjellja e reve? Mbjellja e reve është diçka reale. Ka të bëjë me manipulimin e reve ekzistuese për t’i ndihmuar ato që të prodhojnë më shumë shi ose borë. Kjo bëhet duke lëshuar grimca jodur argjendi tek retë. Avujt e ujit mblidhen rreth këtyre grimcave dhe kështu nis rënia e shiut.
Teknika njihet prej dekadash. Nuk është e pagabueshme, por është përdorur nëpër botë, për shembull për të ujitjen e të mbjellave.
Por nuk të dhëna që të sugjerojnë se mbjellja e reve të ketë lidhje me shirat aktual në Sydney. Kjo nuk i ka penguar disa përdorues në TikTok që të denoncojnë “inxhinierinë e motit”.
Ata thonë se e gjitha është pjesë e një plani të qeverisë për të “armatosur” motin kundër njerëzve të vet, një teori konspirative që qarkullon prej vitesh.
“Ideja që kjo po ndodh në një shkallë të gjerë dhe se ka një motiv për të manipuluar motin është tërësisht mit”, thotë Dr Ellie Gilbert, shkencëtare e klimës në British Antarctic Survey.
“Ne nuk kemi një përpjekje të përbashkët për të ndryshuar motin sepse është thjeshtë fizikisht dhe financiarisht e parealizueshme”, thotë Dr Gilbert, e cila shton se edhe nëse mbjellja e reve mund të luajë rol, do të ishte një efekt absolutisht i papërfillshëm.
Nuk ka një shkak të vetëm për shirat e dendur në Sydney përgjatë ditëve të fundit. Por ekspertët thonë se përmbytjet janë përkeqësuar nga ndryshimet klimatike dhe fenomeni La Niña.
La Niña zhvillohet kur erërat e forta fryjnë ujërat e ngrohta sipërfaqësore të Paqësorit larg nga Amerika e Jugut dhe drejt Indonezisë. Në vend të tyre, ujërat më të ftohtë dalin në sipërfaqe.
Në Australi, La Niña rrit gjasat e shiut, cikloneve dhe temperaturave më të ulëta gjatë ditës.
