Kontaminimi mikroplastik është raportuar për herë të parë në mishin e viçit dhe derrit, si dhe në gjakun e lopëve dhe derrave në ferma.
Shkencëtarët në Vrije Universiteit Amsterdam (VUA) në Holandë gjetën grimcat në tre të katërtat e mishit dhe produkteve të qumështit të testuara dhe në çdo mostër gjaku në studimin e tyre pilot. Produktet ushqimore ishin të paketuara në plastikë, që është një tjetër rrugë e mundshme si mund të ketë ndodhur ndotja.
Studiuesit e VUA raportuan për mikroplastikë në gjakun e njeriut për herë të parë në mars, dhe ata përdorën të njëjtat metoda për të testuar produktet shtazore. Zbulimi i grimcave në gjak tregon se ato mund të udhëtojnë nëpër trup dhe mund të vendosen në organe të tjera.
Ndikimi në shëndetin e njerëzve ose kafshëve të fermës është ende i panjohur, por studiuesit janë të shqetësuar sepse mikroplastika shkakton dëme në qelizat njerëzore në laborator dhe grimcat e ndotjes së ajrit tashmë dihet se hyjnë në trup dhe shkaktojnë miliona vdekje në vit. Disa kafshë të egra dihet gjithashtu se dëmtohen nga mikroplastika .
Sasi të mëdha mbetjesh plastike hidhen në mjedis dhe mikroplastika ka kontaminuar të gjithë planetin, nga maja e malit Everest e deri te oqeanet më të thella. Njerëzit njiheshin tashmë për konsumimin e grimcave të vogla nëpërmjet ushqimit dhe ujit, si dhe duke i thithur ato .
“Kur matni gjakun, ju zbuloni dozën e absorbuar nga të gjitha rrugët e ndryshme të ekspozimit: ajri, uji, ushqimi etj. Pra, është shumë interesante sepse ju tregon menjëherë se çfarë po depërton në lumin e jetës,” tha Dr Heather Leslie në VUA.
Studimi pilot u krye për të vlerësuar nëse mikroplastikat janë të pranishme në kafshët e fermës, mish dhe qumësht.
“Kjo duhet të veprojë si një shtysë për të eksploruar më tej shtrirjen e plotë të ekspozimit dhe çdo rrezik që mund të lidhet me të,” tha Leslie.
Shkencëtarët testuan 12 mostra të gjakut të lopëve dhe 12 të gjakut të derrit dhe gjetën mikroplastikë në të gjitha, duke përfshirë polietilenin dhe polistirenin. 25 mostrat e qumështit përfshinin qumësht nga kutitë e supermarketeve, depozita qumështi në ferma dhe mjelje me dorë. Tetëmbëdhjetë nga mostrat, duke përfshirë të paktën një nga secili lloj, përmbanin mikroplastikë.
Shtatë nga tetë mostrat e mishit të viçit dhe pesë nga tetë mostrat e derrit ishin të kontaminuara.
“Mbetet e panjohur nëse ka ndonjë rrezik të mundshëm toksikologjik nga këto gjetje”, thuhet në raport.
Kafshët e fermës dhe mishi ende nuk janë testuar në vende të tjera, por mikroplastika u raportua në qumështin e blerë në Zvicër në vitin 2021 dhe qumështin e fermës në Francë. Kjo ngre alarmin se kontrolle të vazhdueshme duhet të bëhen për të mbajtur në kontroll cilësinë e jetës.
