Një person me intolerancë ushqimore ka vështirësi në tretjen e disa ushqimeve. Është e rëndësishme të theksohet se një intolerancë ushqimore është e ndryshme nga një alergji ushqimore.
Megjithëse ato kanë disa simptoma të përbashkëta, simptomat e intolerancës ushqimore duan më shumë kohë për t’u shfaqur sesa simptomat e alergjisë ushqimore. Ndërsa një alergji ushqimore rezulton nga një reagim i sistemit imunitar ndaj një ushqimi specifik, një intolerancë ushqimore përfshin sistemin tretës dhe jo sistemin imunitar.
Tek një intolerancë ushqimore, sasia e ushqimit që ha personi lidhet me ashpërsinë e simptomave të tij. Nga ana tjetër, me një alergji ushqimore, edhe një sasi e vogël ushqimi mund të shkaktojë një reaksion të rëndë alergjik.
Intoleranca ushqimore lind kur trupi nuk mund të tresë siç duhet disa ushqime. Intoleranca ndaj laktozës dhe intoleranca ndaj glutenit janë llojet më të zakonshme. Aktualisht nuk ka kurë për intolerancën ushqimore. Mënyra më e mirë për të shmangur simptomat e intolerancës ushqimore është të shmangni disa ushqime ose t’i hani ato më rrallë dhe në sasi më të vogla. Gjithashtu mund të marrni suplemente për të ndihmuar tretjen.
