Nafta shitet sot me 248 lekë/litër, çmim rekord që nuk ishte shënuar prej muajit mars. Bordi i Transparencës, i ngritur për të përcaktuar çmimin e tregtimit të karburanteve për kompanitë e tregtisë me pakicë, ka rinisur rritjen graduale të kostos së naftës.
Në kushtet kur çmimi i karburanteve ka pësuar rritje drastike, është vënë re dhe rënia e konsumit të tyre. Sipas raportit të Ministrisë së Financave, çmimet e larta të karburanteve po ndikojnë negativisht në konsumin e tyre nga qytetarët.
Makina për disa nuk është një mjet luksi, pasi shumë e përdorin për të shkuar në punë, kur distanca nga banesa është e largët. Megjithatë, rritja e çmimi të naftës duket s epo i detyron shqiptarët ‘të fikin’ makinat.
Edhe importet e karburanteve pësuan një rënie vjetore të ndjeshme për të dytin muaj radhazi.
Sipas të dhënave nga Ministria e Financave, në prill 2022 u importuan gjithsej 42, 899 tonë naftë nga 49,105 tonë që ishin në prill 2021 me një rënie vjetore 12.6%. Vitin e kaluar në prill importet e karburanteve shënuan rekorde historike, për arsye se të kërkesës së lartë që u shfaq pas heqjes së kufizimeve në lëvizje nga pandemia Covid-19.
Aktualisht një litër naftë sot po shitet me 248 lekë/litër, duke iu afruar çmimit rekord që arrit gjatë muajit mars në 260 lekë/litër. Në qershorin e vitit 2021 një litër naftë shitej me 160 lekë/litri. Çmimi i naftës në tregun vendas është shtrenjtuar me 30% krahasuar me fundin e muajit shkurt të këtij viti.
