Në Qendrën e Shfaqjeve dhe Kongreseve në Doha të Katarit ka nisur hedhja e shortit e 32 kombëtareve finaliste të Botërorit 2022, teksa do të pozicionohen në 8 grupe.
Si funksionon?
Skuadrat e kualifikuara (29, pasi 3 ende nuk janë mësuar) janë vendosur në 4 vazo, të gjitha të përcaktuara në bazë të renditjes së fundit të FIFA-s publikuar ditën e djeshme. Vendit organizator, Katarit, i bashkohet në Vazon 1, Brazili, Belgjika, Franca, Argjentina, Anglia, Spanja dhe Portugalia.
Për herë të parë në histori shorti do të hidhet pa u njohur të gjitha skuadrat finaliste. Pritet të luhen 3 “play off”-et, një në Europë, me Skocinë që do të luajë kundër Ukrainës dhe dy “play off”-et ndërkontinentale me tek ndeshje që do të luhen në qershor. Zelanda e Re do të përballet me Kosta Rikën, ndërsa Peruja pret fituesit e “play off”-it të Azisë mes Australisë dhe Emirateve të Bashkuara Arabe.
Shorti nuk është i lirë – FIFA i ka ndarë skuadrat gjeografikisht, por me 13 kombëtare europiane në 8 grupe, do të thotë se 5 nga grupet do të kenë dy ekipe nga kontinenti i vjetër. Oraret e ndeshjeve do të jenë 11:00, 14:00, 17:00 dhe 20:00, duke nisur nga 21 nëntori deri më 18 dhjetor.
MINUTË PAS MINUTE:
17:50 – Për këtë short ka folur dhe fituesi i Kupës së Botës në 2002, Kaka, i cili është shprehur: “Kur e shikon nga jashtë duket sikur nuk ka shumë probleme. Por ka gjithmonë vend për përmirësime”.
18:20 – Presidenti i FIFA-s, Xhani Infantinio, mori fjalën hyrëse, i cili pasi i uroi mirëseardhje të gjithëve u shpreh: “Kjo Kupë Bote do të jetë më e mira në histori. Kjo Kupë Bote do të jetë e paqes. Ju lutem mjaft me luftëra. Shijoni futbollin. Shijoni Botërorin. Shijoni këtë mbrëmje të mrekullueshme. Ju faleminderit”.
18:25 – FIFA kujton dhe legjendat e futbollit që fatkeqësisht kanë humbur jetën përpara se ky Botëror të startonte si: Maradona, Rosi, Benks dhe Myler.
18:33 – Tekniku i Francës, Didie Deshamp solli trofeun që fitoi përpara katër vitesh në skenën e Dohas, i cili u shpreh: “Jam i emocionuar për ta sjellë këtë trofe në këtë në skenë. Jam jashtë mase i emocionuar”.
