Ditën e djeshme u regjistrua një ngjarje e rëndë në Egaleo të Greqisë. Një grua me origjinë nga Shqipëria ka hedhur nipin dhe mbesën nga ballkoni dhe më pas është hedhur dhe vetë. Ndërkohë pas ngjarjes, kanë dalë në dritë detaje të reja.
37-vjeçarja, e cila mësohet se vuante nga probleme të shëndetit mendor kishte shkuar dje në mëngjes në banesën e motrës së saj, një 42-vjeçare ku për arsye ende të paqarta ishin grindur të dyja.
Bëhet e ditur se pas grindjes tezja nga Shqipëria hodhi nga ballkoni dy të miturit, djalin 5 vjeç dhe vajzën 3 vjeç ku pasi i ka hedhur nga kati i dytë i ka goditur edhe me vazo lulesh.
Më pas ajo është vetëhedhur nga ballkoni dhe ka përfunduar në një hapësirë boshe. Kanë qenë fqinjët të cilët kanë dëgjuar të bërtiturat dhe të qarat e fëmijëve që i kanë dhënë ndihmën e parë dhe kanë lajmëruar nënën e tyre e cila në momentin e ngjarjes ka qenë duke gatuar në kuzhinë.
