Prej disa ditësh është konfirmuar se në vendin tonë ka mbërritur gripi i shpendëve, ndërsa mijëra pula kanë ngordhur. Kjo ka rritur shqetësim jo vetëm në pularitë në të gjithë vendin, por edhe te konsumatorët.
I ftuar në “Mëngjesi në Dritare”, Profesor Doktor Kristaq Berxholi foli lidhur me situatën, ndërsa theksoi se nuk ka rrezik për konsumimin e mishit të pulës, apo vezës.
“Njerëzit të mos kenë panik, “kujdes po, panik jo”. Unë garantoj 100% se në treg nuk ka pula të infektuara me virusin përkatës. Asnjë pulë e tillë nuk ka dalë në treg, dhe sikur mos të jetë dëmtuar nga gripi i shpendëve. Edhe produktet e tjera nuk kanë dalë në treg sepse janë brenda karantinës. Por megjithatë duhet që njerëzit të zbatojnë rregullat e gatimit të mirë të këtyre produkteve, gjë e cila i mbron jo vetëm nga viruset, por edhe nga elementet e tjera të rrezikshme. Prandaj, konsumoni shpendët që janë në markete pa asnjë merak, vetëm ziejini mirë”, thotë Berxholi.
