Shpresat që pandemia mbaroi mund të kenë qenë të parakohshme. Rastet e përgjithshme të koronavirusit në mbarë globin po vazhdojnë të rriten, sipas OBSH-së.
Deltacron dhe Stealth Omicron janë dy lloje që duket se po sjellin një fazë tjetër të re të luftës kundër koronavirusit.
Çfarë është Deltacron?
Siç sugjeron emri, është një variant i Covid-19 që përbëhet nga dy mutacionet Delta dhe Omicron: me siguri u shfaq në një pacient që ishte i infektuar me të dyja në të njëjtën kohë, sipas raportimeve.
Deri më tani është zbuluar në disa rajone të Francës dhe duket se ka qarkulluar që nga fillimi i janarit.
Rreth 30 raste janë zbuluar në Mbretërinë e Bashkuar, sipas Agjencisë së Sigurisë Shëndetësore në Mbretërinë e Bashkuar.
Se sa e rrezikshme mund të jetë mbetet e hapur për hamendje. Analiza sugjeron se është kryesisht e ngjashme me Delta-n, por vjen me proteinën spike të Omicron – që do të thotë se kombinon ashpërsinë e Delta me infektivitetin e Omicron.
Megjithatë, për shkak të rritjes së imunitetit të njeriut ndaj të dy varianteve, shkencëtarët sugjerojnë se deri më tani është duke bërë relativisht pak dëm.
Çfarë është Stealth Omicron?
Më e njohur nga të dy variantet, Stealth Omicron e njohur gjithashtu si BA.2 (Omicron ishte BA.1), u zbulua për herë të parë në MB në dhjetor. BA.2 etiketohet si një “variant nën hetim” dhe jo një variant shqetësimi.
Megjithatë, ekspertët sugjerojnë se mund të jetë lloji më i transmetueshëm i koronavirusit.
Tashmë, mendohet se përbën më shumë se gjysmën e të gjitha rasteve të reja në Angli, ndërsa është zbuluar edhe në Gjermani, Kinë dhe Indi. Në Danimarkë, mendohet se ka shkaktuar një rritje të madhe gjatë muajit shkurt.
Sa raste ka secili prej tyre?
Numrat globalë mbeten të paqartë për Deltacron. Rreth 30 raste mendohet të jenë identifikuar në Britaninë e Madhe me 17 të tjera në SHBA, por janë gjetur edhe disa në Francë ku u identifikua për herë të parë, si dhe në Holandë dhe Danimarkë.
Për Stealth-in ka më shumë të dhëna. Në Angli, thuhet se përbën 57 për qind të 27,000 rasteve të reja të regjistruara në javën e fundit të shkurtit, ndërsa në SHBA mendohet se përbën 23.1 për qind të të gjitha rasteve.
Rritjet në Kinë, Hong Kong dhe Korenë e Jugut – ku ka shumë më pak imunitet natyror – mendohet të jenë si rezultat i Omicronit origjinal dhe Stealth.
Sa serioze mund të jenë ata të dy?
Të dy variantet janë shumë të transmetueshme. Vendet me imunitet të ulët natyror dhe me numër të ulët të vaksinimit do të jenë veçanërisht të cenueshme.
