Komiteti i Imunizimit në Shqipëri ka autorizuar vaksinimin antiCovid për fëmijët mbi 12 vjeç.
Pas rekomandimit të mërkurën nga Komiteti i Ekspertëve për uljen e moshës së vaksinimit, burime për Tv Klan bënë me dije se edhe anëtarët e Komitetit të Imunizimit e kanë miratuar këtë vendim.
Sipas tyre vaksinimi i fëmijëve 12 vjeç bëhet për të shmangur format e rënda të sëmundjes tek kjo grupmoshë. Prej 3 Marsit, vaksinimi për të gjithë fëmijët do të kryhet vetëm në prani të prindërve.
Aktualisht në pavionin infektiv të pediatrisë po marrin trajtim spitalor 7 fëmijë për shkak të komplikacioneve nga Covid. Fatmirësisht gjendja e tyre shëndetësore nuk është e rëndë dhe pritet që të dalin nga spitali.
Sipas vendimit të Komitetit Teknik të Ekspertëve, prej kësaj të enjte në Shqipëri nuk ka më orë policore për baret dhe restorantet si dhe lëvizjen e qytetarëve.
