Ditën e sotme Kosova dhe Serbia do të takohen përsëri në Bruksel në një përpjekje tjetër për të gjetur gjuhën e dialogut mes tyre. Në takim do të jenë të pranishëm kryenegociatorët e të dy vendeve.
Takimin e parë me të dërguarin e posaçëm të Bashkimit Europian për dialog, Mirosllav Lajçak do ta ketë zëvendëskryeministri i Kosovës, Besnik Bislimi. Më pas takimin e të njëjtës natyrë do e ketë edhe shefi i delegacionit të Serbisë, Petar Petkoviç.
Ndryshe nga takimet e tjera mes negociatorëve ku shpesh nuk janë takuar fare me njëri-tjetrin, sot, në orët e pasdites pritet që të dyja palët të ulen në tryezë për të gjetur gjuhën e përbashkët lidhur me zbatimin e marrëveshjeve të deri tanishme dhe hapat e ardhshëm në normalizimin e raporteve mes Kosovës dhe Serbisë. Temat për të cilat do të diskutohet do të jenë çështja e të pagjeturve që nga koha e luftës, ajo e targave të automjeteve dhe çështja e energjisë.
Kreu i Zyrës për Kosovën Petar Petkoviç do të kërkojë zbatimin e marrëveshjes për krijimin e Asociacionit të komunave me shumicë serbe në Kosovë dhe për mbajtjen e zgjedhjeve të Serbisë në territorin e Kosovës. Kjo vjen pasi Serbia mban zgjedhjet e parakohshme parlamentare dhe ato presidenciale më 3 prill. Institucionet e Kosovës, ndryshe nga praktika e mëparshme, kanë paralajmëruar se nuk do të lejojnë organizimin e tyre në Kosovë pasi cenohet sovraniteti.
Dialogu mes Kosovës dhe Serbisë, me ndërmjetësim të BE-së, ka nisur më 2011. Lidhur me çështjen e targave është arritur një draft – marrëveshje në vjeshtën e vitit të kaluar me shpresën se pas gjashtë muajsh do të arrihet një marrëveshje afatgjate. Të dyja palët kanë thënë publikisht se janë të gatshme për një takim të tillë, por BE ka insistuar se nëse do të ndodhë, duhet të ketë edhe rezultate konkrete.
