20 deri në 25 qytetarë shtrohen çdo ditë në spitalin infektiv Covid 1 për shkak të komplikacioneve nga Covid.
“Mesatrisht nga Covid këtë periudhën e fundit po shtrohen 20-25 pacientë çdo ditë. Gjendja shëndetësore është e larmishme paraqiten që tek format e rënda me insuficencë respiratore dhe deri tek format që janë më të lehta që janë me sasi të pakët oksigjenore ose që predominojnë format me temperaturë të lartë”, shprehet mjekja Edlira Petoshi.
Mes të shtruarve vijojnë të jenë edhe grupmoshat e reja. Sipas mjekëve, pacienti më i ri i shtruar në spital është 17 vjeç.
“Grupmosha varion nga moshat e treta mbi 80 vjeç, kemi edhe në mosha të reja deri në 17 vjeç, të cilët janë të hospitalizuar dhe po marrin trajtim. Predominojnë rastet e pavaksinuar. Pjesa më e madhe e pacientëve që hospitalizohen dhe marrin shërbim në spitalin Covid 1 janë të pavaksinuar”, shprehet mjekja Edlira Petoshi.
Mjekët bëjnë apel për vaksinimin e të rinjve, si të vetmen rrugë për të shmangur format e rënda të sëmundjes dhe fatalitetet.
