CEO i Pfizer, Albert Bourla, të hënën tha se një vaksinë për mbrojtjen nga varianti omicron do të jetë gati në mars dhe kompania tashmë ka filluar prodhimin e dozave.
Bourla gjithashtu deklaroi se vaksina do të synojë gjithashtu variantet e tjera që qarkullojnë. Ai tha se ende nuk është e qartë nëse nevojitet apo jo një vaksinë për omicron ose si do të përdoret, por Pfizer do të ketë disa doza gati pasi disa vende e duan sa më shpejt të jetë e mundur.
Të dhënat nga Mbretëria e Bashkuar kanë treguar se vaksinat e Pfizer dhe Moderna janë vetëm rreth 10% efektive në parandalimin e infeksionit simptomatik nga Omicron 20 javë pas dozës së dytë, sipas studimit nga Agjencia e Sigurisë Shëndetësore në Mbretërinë e Bashkuar. Megjithatë, dy dozat origjinale ende ofrojnë mbrojtje të mirë kundër sëmundjeve të rënda, zbuloi studimi.
Sipas studimit, vaksinat përforcuese janë deri në 75% efektive në parandalimin e infeksionit simptomatik.
