Ka nisur tashmë ndarja e bonusit të fundvitit për të gjithë pensionistët në vend. Për të shmangur radhët pranë qendrave të pagesës, Instituti i Sigurimeve Shoqërore ka detajuar grafikun me datat e shpërndarjes së shpërblimit për të gjitha kategoritë përfituese në radhët e pensionistëve në të gjithë vendin, të cilët edhe këtë fundvit do të sigurojnë bashkë me pagesën mujore të pensionit edhe bonusin prej 5,000 lekësh. Nga vendimi i miratuar pak ditë më parë nga Qeveria do të përfitojnë 688 mijë pensionistë në të gjithë vendin.
Sipas skemës së përcaktuar, për të eliminuar radhët e marrjes së shpërblimit, por njëkohësisht për të respektuar dhe masat anti-Covid është hartuar një grafik së bashku me Postën Shqiptare, që gjatë paradites do të jepet kësti mujor i pensionit për muajin dhjetor plus shpërblimin, ndërsa nga mesdita deri në momentin që zyrat e Postës Shqiptare do të jenë zyrat hapura, deri nga ora 18.00, apo më vonë, do të mund të marrin vetëm shpërblimin ata pensionistë që e kanë marrë pensionin deri më datën 15 dhjetor. Për shembull, data 16 dhe dita e djeshme 17 dhjetor është ezauruar dhe të gjithë ata që kanë marrë pensionin nga data 1 deri në datën 15 janë planifikuar, sipas grafikut të përcaktuar që ta marrin shpërblimin në orët e pasdites, deri datën në 31 dhjetor. Kjo me qëllim që të mos mbetet asnjë pensionist që ka dëshirë që ta tërheqë pensionin brenda dhjetorit, por njëkohësisht edhe të mos krijohen grumbullime njerëzish dhe të respektohen masat antiCovid.
“Pensionistëve që e marrin pensionin pranë bankave të nivelit të dytë, shpërblimi i fundvitit do të kalohet në llogarinë bankare të çelur për kreditimin e pensionit mujor. Kalimi i shpërblimit në llogarinë bankare do të bëhet ditën e hënë në datën 20 dhjetor. Pensionistet që e kanë marrë pensionin e muajit dhjetor përpara datës 16.12.2021, dhe ata që do të paguhen pas kësaj date mund ta tërheqin shpërblimin e fundvitit sipas grafikut që e gjeni të detajuar në vijim ”, sqaroi gjatë ditës së djeshme kreu i Institutit të Sigurimeve Shoqërore Astrit Hado.
Kategoritë që përfitojnë këtë lloj shpërblimi janë të gjithë pensionistët e pleqërisë, gjithë pensionistët familjarë, përfituesit e invaliditetit, ata që përfitojnë pension social, gjithë personat që përfitojnë pension të parakohshëm për vjetërsi shërbimi, përfshirë dhe ish ushtarakët e Ministrisë së Mbrojtjes, policisë së shtetit, drejtorisë së burgjeve, zjarrfikësve, shërbimit informative shtetëror, dhe të gjithë kategoritë e tjera të cilat kanë dalë para kohe në pension, siç janë trajtimet e të veçanta të minatorëve, trajtimet e veçanta të ish punonjësve të policisë ushtarake gjithë minatorët metalurgët dhe naftëtarët që kanë dalë para kohe në pension. Pra, e gjithë gama e përfituesve që trajtohen nga ISSH marrin dhe përfitojnë këtë lloj shpërblimi.
“Këtë lloj shpërblimi e përfitojnë jo vetëm ata që në momentin që ka dalë vendimi kanë statusin e përfituesit, pensionistit apo me trajtim të veçantë, por edhe të gjithë ata qytetarë të cilëve kjo e drejtë u lind deri në datën 31 dhjetor 2021. Pra, edhe ata që mbushin moshën për të dalë në pension deri në datën 31 kanë të drejtën e përfitimit të këtij shpërblimi. Të gjithë ata që nuk kanë mundësi ose nuk duan ta tërheqin këtë lloj shpërblimi gjatë ditëve të mbetura të muajit dhjetor, e kanë këtë të drejtë që ta marrin në momentin kur ata tërheqin pensionin dhe kjo e drejtë ruhet deri në 36 muaj, pra për aq kohë sa pensionisti nuk humbet të drejtën për të marrë pensionin e vet, njëkohësisht nuk humbet as të drejtën për të marrë shpërblimin”, vuri në dukje Hado.
Grafiku i detajuar për ndarjen e shpërblimeve:
Pensionistëve që e marrin pensionin pranë bankave të nivelit të dytë, shpërblimi i fundvitit do të kalohet në llogarinë bankare të çelur për kreditimin e pensionit mujor. Kalimi i shpërblimit në llogarinë bankare do të bëhet në datën 20.12.2021
Pensionistet që e kanë marrë pensionin e muajit dhjetor 2021 përpara datës 16.12.2021 dhe ata që do të paguhen pas kësaj date mund ta tërheqin shpërblimin e fundvitit sipas grafikut të detajuar në vijim.
Në datën 17 dhjetor do të tërheqin shpërblimin pensionistët që tërheqin pensionin në këtë datë dhe ato që e kanë tërhequr pensionin në datën 1 dhjetor 2021.
Në datën 18 dhjetor do te tërheqin shpërblimin pensionistët që tërheqin pensionin në ketë datë dhe ato që e kanë tërhequr pensionin në datën 2 dhjetor.
Në datën 20 dhjetor do të tërheqin shpërblimin pensionistët që tërheqin pensionin në këtë datë dhe ato që e kanë tërhequr pensionin në datën 3 dhjetor.
Në datën 21 dhjetor do të tërheqin shpërblimin pensionistët që tërheqin pensionin në ketë date dhe ato që e kanë tërhequr pensionin në datën 6-7 dhjetor.
Në datën 22 dhjetor do të tërheqin shpërblimin pensionistët që tërheqin pensionin këtë datë dhe ato që e kanë tërhequr pensionin në datën 8- 9 dhjetor.
Në datën 23 dhjetor do të tërheqin shpërblimin pensionistët që tërheqin pensionin këtë datë dhe ato që e kane tërhequr pensionin në datën 10 dhjetor.
Në datën 24 dhjetor do të tërheqin shpërblimin pensionistët që tërheqin pensionin këtë datë dhe ato që e kanë tërhequr pensionin në datën 13 dhjetor.
Në datën 27 dhjetor do të tërheqin shpërblimin pensionistët që tërheqin pensionin këtë datë dhe ato që e kane tërhequr pensionin në datën 14-15dhjetor.
Në datën 28 dhjetor do të tërheqin shpërblimin pensionistët që tërheqin pensionin këtë datë dhe ato që e kane tërhequr pensionin në datën 16 dhjetor.
Në datën 29 dhjetor do të tërheqin shpërblimin pensionistët që tërheqin pensionin këtë datë dhe raste të tjera që nuk janë paguar sipas grafikut në ditët më përpara.
Në datën 30 dhjetor do të tërheqin shpërblimin pensionistët që tërheqin pensionin këtë datë dhe raste të tjera që nuk janë paguar sipas grafikut në ditët më përpara.
Për pensionistet që e tërheqin pensionin në zyrat postare në fshatra, shpërblimi do të paguhet sipas datave të pagesës së pensioneve, duke filluar nga data 17 dhjetor e në vazhdim.
Shpërblimet e pa tërhequra në dhjetor paguhen përgjatë viteve në vazhdim, sipas nenit nr 62 të ligjit nr 7703 dt 11.05.1993, i ndryshuar, me paraqitjen e përfituesve në sportele.
