CNN i ka dedikuar një dokumentar të shkurtër xhudistes shqiptare nga Kosova, Majlinda Kelmendi. CNN e quan Kelmendin një heroinë nga Kosova dhe një legjendë të sportit të xhudos.
Në dokumentarin e CNN: “Kjo është Majlinda Kelmendi. Sportistja kosovare është një nga më të mirat në botë në peshën 52 kg në sportin e xhudos. Majlinda Kelmendi filloi të praktikojë sportin e xhudos në moshën 8 vjeçare në qytetin e saj të Pejës. Në moshën 18 vjeçare, ajo fitoi medjalen e artë në vitin 2009 në kampionatin botëror të xhudos për të rinj në Paris. Në vitin 2013 në Rio, Kelmendi fitoi medaljen e artë duke u bërë kampionia e parë e botës në xhudo nga Kosova. Ajo përsëriti suksesin në vitin 2014 në Rusi ku u shpall kampione e botës në xhudo. Kelmendi gjithashtu ka fituar 13 tituj dhe çmime që nga viti 2013. Sportistja kosovare është shpallur tre herë edhe kampione e Europës në vitet 2014, 2016, 2017”.
Kampionia e xhudos Majlinda Kelmendi vendosi të tërhiqet zyrtarisht nga sporti aktiv dhe të vijojë si asistente e trajnerit Driton Kuka, përzgjedhës i përfaqësueses së Kosovës. Shkak për këtë vendim janë bërë lëndimet e shumta të xhudistes.
Kelmendi arriti që në Lojërat Olimpike “Rio 2016” të fitojë medaljen e artë të parë Olimpike për të, por edhe të parën për Kosovën. Ajo u bë dy herë kampione e botës dhe katër herë kampione e Evropës. Përgjatë karrierës, Kelmendi po ashtu fitoi katër herë titullin më garën e famshme të Grand Slamit të Parisit. Në vitin 2017 ajo u shpall xhudistja më e mira në botë.
