Negociatat e anëtarësimit me Shqipërinë dhe Maqedoninë e Veriut renditen mes prioriteteve të qeverisë së re gjermane. Mediat gjermane kanë publikuar detaje nga marrëveshja e koalicionit të ri mes socialdemokratëve, të gjelbërve dhe liberaldemokratëve, ku thuhet se ‘si hap pasues duhet të hapen kapitujt e parë të anëtarësimit në BE me Shqipërinë dhe Maqedoninë e Veriut’.
Thirrje bëhet edhe për liberalizimin sa më të shpejtë të vizave për qytetarët nga Kosova, që ata të mund të lëvizin të lirë në vendet e hapësirës Shengen. Dialogu për normalizimin e marrëdhënieve mes Prishtinës dhe Beogradit është një tjetër pikë e rëndësishme në programin për politikën e jashtme të qeverisë së re.
Kandidati për kancelar Olaf Sholc tha për mediat se Gjermania nuk do të qëndrojë në pozitat e një vendi që vetëm jep opinione për politikën ndërkombëtare. Por veprimet, sipas tij do të koordinohen me Shtetet e Bashkuara dhe aleatët. Në atë që mund të konsiderohet “Epoka e re post-Merkel”, Gjermania do të mbështesë projektin për një federatë europiane, si pikë orientimi për reformimin e Bashkimit Europian.
