Dhjetë janë kategoritë e studentëve që ndjekin ciklin e parë të studimeve “Bachelor” dhe që do të mund të përfitojnë bursë nga shteti për vitin akademik 2021-2022 në Fakultetin e Historisë dhe Filologjisë në Universitetin e Tiranës.
Sipas përcakimeve të bëra, të drejtën për të përfituar bursë e kanë të gjithë studentët që u përkasin këtyre shtresave, vijnë nga familjet që trajtohen me ndihmë ekonomike, bashkëshortët që kanë fëmijë dhe janë të dy studentë e që do përfitojnë secili bursë financiare. Për bursat mund të aplikojnë edhe studentët persona me aftësi të kufizuara, të vërtetuar nga Komisioni Mjekësor i Caktimit të Aftësisë për Punë, studentët që i kanë të dy prindërit me aftësi të kufizuara të vërtetuar me po ashtu me vendim të komisionit mjekësor të caktimit të aftësisë për punë dhe që janë përfitues të pagesës së aftësisë së kufizuar.
Me bursë do të mbështeten edhe studentët që i kanë të dy prindërit pensionistë ose njërin prind pensionist dhe prindi tjetër nuk jeton, studentët që janë të tretët në radhën e fëmijëve e lart, nga të cilët dy të parët janë studentë në institucionet publike të arsimit të lartë. Gjithashtu kushtet për bursë i përmbushin edhe studentët që kanë përfituar statusin e jetimit deri në moshën 25 vjeç, studentët që kanë humbur kujdestarinë prindërore me vendim gjykate të formës së prerë deri në moshën 25 vjeç, studentët që janë identifikuar si viktima të trafikut të qenieve njerëzore dhe kanë përfituar statusin ligjor për trajtim si viktima të trafikut të qenieve njerëzore deri në moshën 25 vjeç, si dhe studentët që janë fëmijë të punonjësve të policisë së shtetit, të gardës së republikës, të shërbimit për çështjet e brendshme dhe ankesat, të shërbimit të mbrojtjes nga zjarri dhe shpëtimin, të forcave të armatosura, të shërbimit informativ të shtetit dhe të policisë së burgjeve që kanë humbur jetën në krye dhe për shkak të detyrës.
Aplikimet për bursat e studimit kanë nisur tashmë, dhe studentët duhet që fillimisht të bëjnë aplikimin online dhe më pas të bëjnë të mundur edhe dorëzimin e dosjes së dokumenteve të përcaktuara deri në datën 18 nëntor në ambientet e fakultetit. Për secilën prej këtyre kategorive është detajuar edhe dosja e dokumenteve që duhet të paraqesin në afatet e lejuara për sigurimin e bursës, dosje të cilën e gjeni të detajuar në vijim të shkrimit.
“Dorëzimi i dokumentacionit do të kryhet online dhe më pas fizikisht në kutitë e vendosura në hollin e fakultetit deri në datën 18 nëntor. Studentët e viteve të dyta dhe të treta duhet të logojnë me adresën e fakultetit (emër_mbiemër.fhfstudent@unitir.edu.al) për të kryer aplikimin online. Ndëra studentët e vitit të parë gjatë këtyre ditëve të mbledhin dokumentacionin e duhur dhe ndërkohë do të pajisen mjaft shpejt me adresë për të kryer aplikimin online”, sqarojnë autoritetet e Fakultetit të Historisë dhe Filologjisë.
Ndonëse mund t’u përkasin kategorive të listuara më lart, nga plani i bursave përjashtohen të gjithë studentët që janë duke ndjekur një program të dytë studimi për të cilin duhet të përballojnë koston e plotë të studimeve (nga ky rregull përjashtohen studentët e shkëlqyer), si dhe studentët përsëritës. Pas dorëzimit të dokumentacionit dhe verifikimit në zyrat që kanë lëshuar dokumentet, vendimi për studentët që do të përfitojnë bursë do të merret nga bordi i Administrimit.
STUDENTET, FAMILJET E TË CILËVE TRAJTOHEN ME NDIHMË EKONOMIKE:
Formulari i kërkesës për t’u trajtuar me bursë që shkarkohet online nga faqja e fakultetit.
Certifikatë familjare.
Vërtetim nga Njësia Administrative për trajtim me ndihmë ekonomike nga seksioni i ndihmës ekonomike në Bashki, ku të cilësohet numri i dosjes dhe vlera e saj. Ky dokument duhet të jetë i protokolluar, me firmë dhe me vulë.
Fotokopje të kartës së ID të vetë studentit.
Vërtetim studenti.
BASHKËSHORTËT QË KANË FËMIJË DHE JANË TË DY STUDENTË, PËRFITOJNË SECILI BURSË FINANCIARE:
Formulari i kërkesës për t’u trajtuar me bursë që shkarkohet online nga faqja e fakultetit.
Vërtetim studenti nga institucionet publike IAL për të dy prindërit.
Certifikatë familjare.
Fotokopje të kartës së ID të vetë studentit.
Vërtetim studenti.
STUDENTËT, PERSONA ME AFTËSI TË KUFIZUARA, TË VËRTETUAR NGA KMACP, PËRFITUES TË PAGESËS SË AFTËSISË SË KUFIZUAR:
Formulari i kërkesës për t’u trajtuar me bursë që shkarkohet online nga faqja e fakultetit.
Certifikatë familjare.
Fotokopje të kartës së ID të vetë studentit.
Raportin Mjeko Ligjor nga KMCAP-i (i fotokopjuar dhe i noterizuar).
Vërtetim nga Instituti i Sigurimeve Shoqërore apo nga zyrat e ndihmës ekonomike në Njësinë Administrative për pagesën e aftësisë së kufizuar.
Vërtetim studenti.
STUDENTËT QË I KANË TË DY PRINDËRIT ME AFTËSI TË KUFIZUARA, TË VËRTETUAR NGA KMACP, PËRFITUES TË PAGESËS SË AFTËSISË SË KUFIZUAR:
Formulari i kërkesës për t’u trajtuar me bursë që shkarkohet online nga faqja e fakultetit.
Kopje origjinale ose e noterizuar e Vërtetimit të KMCAP-së (Komsionit të caktimit të aftësisë për punë) për të dy prindërit me aftësi të kufizuar (invalid pune, invalid paraplegjik, invalid tetraplegjik).
Vërtetim origjinal të institutit të sigurimeve shoqërore për pagesën e pensionit të invaliditetit. (për të dy prindërit me aftësi të kufizuar).
Vërtetim origjinal nga Njësia administrative për masën e ndihmës sociale që përfitojne prinderit invalid të protokolluar(për të dy prindërit me aftësi të kufizuar).
Certifikatë familjare që vërteton lidhjen e studentit me invalidin e punës/ invalidin paraplegjik ose tetraplegjik.
Fotokopje të kartës së ID të vetë studentit.
Vërtetim studenti.
STUDENTËT QË I KANË TË DY PRINDËRIT PENSIONISTË OSE NJËRIN PRIND PENSIONIST DHE PRINDI TJETËR NUK JETON:
Formulari i kërkesës për t’u trajtuar me bursë që shkarkohet online nga faqja e fakultetit.
Vërtetim origjinal të institutit të sigurimeve shoqërore për pagesën e pensionit të pleqërisë për prindin/ të dy prindërit.
Certifikatë Familjare.
Certifikatë të ndarjes së prindit nga jeta (në rastin kur njëri nga prindërit nuk jeton).
Fotokopje të kartës së ID të vetë studentit.
Vërtetim studenti.
STUDENTËT, TË TRETËT NË RADHËN E FËMIJËVE E LART, TË CILËT VIJNË NGA FAMILJE ME TRE FËMIJË E MË SHUMË, NGA TË CILËT DY TË PARËT JANË STUDENTË NË INSTITUCIONET PUBLIKE TË ARSIMIT TË LARTË:
Formulari i kërkesës për t’u trajtuar me bursë që shkarkohet online nga faqja e fakultetit.
Certifikatë Familjare.
Vërtetim për të dy fëmijët e parë që janë student në IAL Publike.
Fotokopje të kartës së ID të vetë studentit.
Vërtetim studenti.
STUDENTËT QË KANË PËRFITUAR STATUSIN E JETIMIT, DERI NË MOSHËN 25 VJEÇ:
Formulari i kërkesës për t’u trajtuar me bursë që shkarkohet online nga faqja e fakultetit.
Certifikatë Familjare.
Fotokopje të noterizuar të statusit të jetimit.
Fotokopje të kartës së ID të vetë studentit.
Vërtetim studenti.
STUDENTËT QË KANË HUMBUR KUJDESTARINË PRINDËRORE ME VENDIM GJYKATE TË FORMËS SË PRERË, DERI NË MOSHËN 25 VJEÇ:
Formulari i kërkesës për t’u trajtuar me bursë që shkarkohet online nga faqja e fakultetit.
Certifikatë Familjare.
Vendimin e gjykatës të formës së prerë për humbjen e kujdestarisë prindërore.
Fotokopje të kartës së ID të vetë studentit.
Vërtetim studenti.
STUDENTËT QË JANË IDENTIFIKUAR SI VIKTIMA TË TRAFIKUT TË QENIEVE NJERËZORE DHE KANË PËRFITUAR STATUSIN LIGJOR PËR TRAJTIM SI VIKTIMA TË TRAFIKUT TË QENIEVE NJERËZORE, DERI NË MOSHËN 25 VJEÇ:
Formulari i kërkesës për t’u trajtuar me bursë që shkarkohet online nga faqja e fakultetit.
Vërtetimin nga Ministria e Brendshme.
Fotokopje të kartës së ID të vetë studentit.
Vërtetim studenti.
STUDENTËT QË JANË FËMIJË TË PUNONJËSVE TË POLICISË SË SHTETIT, TË GARDËS SË REPUBLIKËS, TË SHËRBIMIT PËR ÇËSHTJET E BRENDSHME DHE ANKESAT, TË SHËRBIMIT TË MBROJTJES NGA ZJARRI DHE SHPËTIMIN, TË FORCAVE TË ARMATOSURA, TË SHËRBIMIT INFORMATIV TË SHTETIT DHE TË POLICISË SË BURGJEVE QË KANË HUMBUR JETËN NË KRYE DHE PËR SHKAK TË DETYRËS.
Formulari i kërkesës për t’u trajtuar me bursë që shkarkohet online nga faqja e fakultetit.
Vërtetimin nga Ministria përkatëse.
Fotokopje të kartës së ID të vetë studentit.
Certifikatë Familjare.
Vërtetim studenti.
